ԵՐԵՎԱՆ, 7 դեկտեմբերի — Sputnik. Հայաստանի և Ադրբեջանի նախագահների հանդիպումը 2018թ-ի ամառ-աշունից շուտ չի կայանա, Sputnik Արմենիային ասաց քաղաքագետ Երվանդ Բոզոյանը` մեկնաբանելով երկու երկրների ԱԳՆ ղեկավարների հանդիպման արդյունքները։
Հայաստանի և Ադրբեջանի ԱԳՆ ղեկավարներ Էդվարդ Նալբանդյանի և Էլմար Մամեդյարովի հանդիպումը կայացել է Վիեննայում դեկտեմբերի 6-ին։
«Չեմ կարծում, որ առաջիկայում Հայաստանի և Ադրբեջանի նախագահները կհանդիպեն։ Վերջին հանդիպումից հետո նրանք չեն հանգել ընդհանուր հայտարարի, թեև կարևորել են այն։ Բացառված չէ, որ 2018թ-ի ամռանը կամ աշնանը հանդիպումը կարող է կայանալ», — ասաց Բոզոյանը։
Նրա խոսքով` ամեն ինչ կախված է բանակցային գործընթացից և այն առաջարկներից, որոնք կանեն միջնորդները։
Նրա կարծիքով` Նալբանդյան-Մամեդյարով բանակցությունները վերաբերել են մանրամասների քննարկմանը, կարծում է քաղաքագետը։
Միաժամանակ տվյալ պահին ոչ մի նոր առաջարկ չկա, ինչպես ասել է ՌԴ ԱԳՆ ղեկավար Սերգեյ Լավրովը տարածաշրջան կատարած այցի ժամանակ։ Իսկ գոյություն ունեցող առաջարկները, ինչպես կարծում է Բոզոյանը, Ադրբեջանը կմերժի։
«Կարևոր հարցերում ընդհանուր հայտարար չկա, այդ մասին վկայում են նաև համանախագահների հայտարարությունները։ Քանի որ կարգավիճակի և զորքերը դուրս բերելու հարցում միասնական մոտեցում չկա, համանախագահները վախենում են ռազմական գործությունների վերսկսումից բանակցությունները դադարեցնելու դեպքում», — ասաց Բոզոյանը։
Ուստի համանախագահները ճնշում են գործադրում կողմերի վրա, որպեսզի նրանք շարունակեն բանակցությունները։ Այդ պայմաններում Հայաստանը և Ադրբեջանը ստիպված են անցկացնել «բանակցություններ` հանուն բանակցությունների»։
Մյուս կողմից, դրանք չեն կարող միայն արձանագրային գրել, ուստի խոսքը մանր հարցերի մասին է։ Թեև քաղաքագետի կարծիքով` նրանք նույնպես որոշակի կարևորություն ունեն։
Հայաստանի ու Ադրբեջանի նախագահներ Սերժ Սարգսյանի և Իլհամ Ալիևի վերջին հանդիպումը կայացել է հոկտեմբերի 16-ին Ժնևում, ԵԱՀԿ Մինսկի խմբի համանախագահների նախաձեռնությամբ։ Համանախագահները հայտարարել են, որ Հայաստանի և Ադրբեջանի նախագահների հանդիպումն անցել է կառուցողական մթնոլորտում։
Ժնևում ԵԱՀԿ ՄԽ համանախագահները, Հայաստանի և Ադրբեջանի արտգործնախարարները վերջին տարիների ընթացքում առաջին անգամ համատեղ հայտարարություն ընդունեցին։ Նախագահները պայմանավորվեցին միջոցներ ձեռնարկել «լարվածությունն ավելի թուլացնելու համար»։ Հանդիպումից մի քանի օր անց առաջնագծում դիպուկահարի հարվածից Արցախի ՊԲ զինծառայող մահացավ։
