ԵՐԵՎԱՆ, 7 դեկտեմբերի — Sputnik. Ցանկացած բանակցություն ավելի լավ է, քան դրա բացակայությունը։ Այսօր լրագրողների հետ զրույցում, մեկնաբանելով Հայաստանի և Ադրբեջանի արտգործնախարարների` դեկտեմբերի 6-ին Վիեննայում կայացած հանդիպման արդյունքները, ասաց ՀՀ փոխարտգործնախարար Շավարշ Քոչարյանը։
«Ցանկացած դեպքում «բանակցությունների այլընտրանքը ռազմական գործողություններն են»,– ավելացրեց նա։
Քոչարյանը մեկնաբանեց նաև հանդիպումից հետո արտգործնախարար Նալբանդյանի այն հայտարարությունը, թե հանդիպումն անցել է դրական մթնոլորտում։
«Քանի որ քննարկվել է Վիեննայի, Սանկտ Պետերբուրգի, Ժնևի համաձայնությունները կյանքի կոչելու հարցը, ապա ակնհայտ է, որ, եթե այդ ուղղությամբ լինի որևէ առաջընթաց, ապա դա դրական է»,– ընդգծեց փոխարտգործնախարարը։
Իսկ առաջընթացը, Քոչարյանի համոզմամբ, կողմերի միջև վստահության ձևավորումն է։
Եվ այս հանդիպումը ևս հերթական անգամ արձանագրել է վստահության մթնոլորտի ձևավորման անհրաժեշտությունը։
Թե որքանով կողմերին կհաջողվի հասնել փոխվստահության, փոխնախարարը դժվարացավ կանխատեսել։
«Ադրբեջանը բանակցությունների սեղանի շուրջ տալիս է համաձայնություն, ապա հենց ինքն էլ խոչընդոտում է ։ Այդ տեսակետից ամեն ինչ անում է ստատուս քվոն պահպանելու համար։ Իսկ եթե ցանկանում է որևէ փոփոխություն, ապա պետք է այդ քայլերը ձեռնարկի»,- ասաց նա։
Հայաստանի և Ադրբեջանի արտաքին քաղաքական գերատեսչությունների ղեկավարների հաջորդ հանդիպումը նախանշվում է 2018թ-ի սկզբին։ Հանդիպումների նման հաճախակիությունը, Շավարշ Քոչարյանի գնահատմամբ, մի կարևոր արդյունք ունի. դրանք նպաստում են շփման գծում լարվածության թուլացմանը։
