ԵՐԵՎԱՆ, 7 դեկտեմբերի — Sputnik. Բազմաբնակարան բնակելի շենքերի տարածքում այսուհետ կարգելվի կարաոկեների, դիսկոտեկների, գիշերային ակումբների, հեստապարերի, բաղնիքների ու սաունաների գործունեությունը։
Նման որոշում է այսօր կայացրել ՀՀ կառավարությունը` նշված օբյեկտները որակելով որպես սահմանափակման ենթակա ծառայության օբյեկտներ։
Նախագիծը ներկայացնող Տնտեսական զարգացման և ներդրումների նախարար Սուրեն Կարայանը որոշման անհրաժեշտությունը բացատրեց բնակելի շենքերի բնակիչներից ստացվող բազմաթիվ բողոքներով ու վարչապետի այդ ուղղությամբ տրված հանձնարարականով։
Բացի բնակելի շենքերից, այսօրինակ ծառայությունների գործունեությունը կարգելվի նաև կրթության և պատմամշակութային, առողջապահական հաստատությունների տարածքում:
Իսկ թե նշված տարածքներից բացի ուրիշ որտեղ կարող են իրենց գործունեությունն իրականացնել նշված զվարճավայրերը այսուհետ մարզերում կորոշեն համայնքների ղեկավարները, Երևանում` Երևանի քաղաքապետը։
