ԵՐԵՎԱՆ, 7 դեկտեմբերի — Sputnik. Հանրահայտ դերասան Արմեն Ջիգարխանյանի նախկին կնոջը` Վիտալինա Ցիմբալյուկ-Ռոմանովսկայային, մեղադրանք է առաջադրվել անձնական կյանքի գաղտնիությունը խախտելու համար, հայտնում է ՌԻԱ Նովոստին` հղում անելով դերասանի փաստաբան Եվգենի Պարֆյոնովին։
«Նրան պաշտոնական մեղադրանք է առաջադրվել ՌԴ ՔՕ 137-րդ հոդվածով (անձնական կյանքի անձեռնմխելիության խախտում)։ Պարզվել է, որ նա ամուսնու անձնական և ընտանեկան կյանքի մասին տեղեկություններ է հավաքել և ԶԼՄ-ներում տարածել առանց Ջիգարխանյանի համաձայնության», — հայտնել է Պարֆյոնովը ՌԻԱ Նովոստիին։
Մի քանի շաբաթ շարունակ հասարակությունը քննարկում է Արմեն Ջիգարխանյանի ու նրա երիտասարդ կնոջ շուրջ ծավալված սկանդալը։
Դերասանը հայտարարել է, որ կինը խաբեությամբ յուրացրել է փողերը, իր անունով դարձրել անշարժ գույքն ու մահափորձ կազմակերպել։
Վիտալինան իր հերթին հայտարարել է, որ որևէ հարցում մեղավոր չէ, ավելին` նա կատարվածի համար մեղադրում է Ջիգարխանյանին շրջապատող մարդկանց։
