Նմանօրինակ որոշումները վկայում են, որ ՅՈՒՆԵՍԿՕ-ն իր հեղինակության մասին չի մտածում։ Sputnik Արմենիայի հետ զրույցում, անդրադառնալով տոլման ադրբեջանական կերակրատեսակ որակելու մասին որոշմանը, ասաց ՙԽոհարարական ավանդույթների զարգացման և պահպանման» հասարակական կազմակերպության նախագահ Սեդրակ Մամուլյանը։
«Այստեղ ոչ մի լուրջ բան չկա, ամենասովորական առուծախ է։ Դա ոչ մի կերպ չի կարող ազդել մեր խոհանոցային մշակույթի վրա։ Մենք մեր գործը շարունակելու ենք, շարունակելու ենք աշխարհին ներկայացնել մեր ազգային կերակրատեսակները, դրանց թվում նաև` տոլման»,- ասաց Մամուլյանը։
Խոհարարի համոզմամբ, տոլմայի թուրքական ծագումը հերքվում է հենց միայն այն հանգամանքով, որ թուրքալեզու այլ ազգեր նման կերակուր չունեն, ունեն միայն հայերի հարևան երկու ազգերը` թուրքերն ու ադրբեջանցիները, որոնք այն փոխառել են իրենց հարևան հայերից։
