ԵՐԵՎԱՆ, 6 դեկտեմբերի — Sputnik. Հայաստանյան անտառների կառավարման բոլոր գործառույթներն առաջիկայում կհանձնվեն բնապահպանության նախարարությանը, իսկ գյուղնախարարության կազմում գտնվող «Հայանտառ» ՊՈԱԿ–ը կվերածվի Անտառային կոմիտեի։
Ոլորտի բարեփոխման առաջին արձանագրային որոշումը նախատեսվում է ընդունել առաջիկա հինգշաբթի օրը։ Նախագիծն արդեն ներառված է ՀՀ կառավարության նիստի օրակարգում։
Կառավարության որոշման արդյունքում Հայաստանի բոլոր անտառները` այդ թվում բնության հատուկ պահպանվող տարածքներում ընդգրկվածները, կհանձնվեն կառավարման մեկ մարմնի:
Ներկայում գյուղատնտեսության նախարարության «Հայանտառ» ՊՈԱԿ-ին են պատկանում Հայաստանի անտառային հողերի շուրջ 75 %-ը, մնացած 25 %-ը, որոնք բնության հատուկ պահպանվող տարածքներում են, կառավարվում են ՀՀ բնապահպանության նախարարության կողմից:
