Արմենուհի Մխոյան, Sputnik.
Sputnik Արմենիան «Մշակութային հայրաքաղաք» նախագծի շրջանակում շարունակում է ներկայացնել հայտնի միստիկ փիլիսոփա Գեորգի Գյուրջիևի մասին փաստեր՝ պատմաբան, գյուրջիևագետ Արթուր Նիկողոսյանի ներկայացմամբ:
Ո՞վ էր աշուղ Ադաշը, և ի՞նչ է գրված նրա տապանաքարին
Գյուրջիևի հայրը՝ Իվան Գյուրջիևը, որ նաև հայտնի էր աշուղ Ադաշ անունով, հյուսն էր և 1878 թվականին ընտանիքի հետ տեղափոխվում է Կարս՝ մասնակցելու այնտեղ ծավալվող շինարարությանը: Կարսում Իվան Գյուրջիևը բացում է սեփական արհեստանոցը, իսկ Գեորգին հաճախում է Կարսի նորաբաց զինվորական եկեղեցուն կից ծխական դպրոց: Այստեղ վանահայր Բոշի ու քահանա Բոգաևսկու օգնությամբ նա ծանոթանում է ուղղափառ քրիստոնեության դավանանքին:
Ծխական դպրոցն ավարտելուց հետո Գեորգին հաճախ էր լինում հայրենի Ալեքպոլում, որտեղ նա պատրաստվում էր հոգևորական դառնալ: Այստեղ նա մտերմանում է իր մորաքրոջ որդի Սերգեյ Մերկուրովի, Ավետիք Իսահակյանի և Էջմիածնի ճեմարանի սան Սարգիս Պողոսյանի հետ, որի հետ էլ Գյուրջիևը ուղևորվում է Սանահին և այնտեղ ծանոթանում հայ առաքելական եկեղեցու դավանանքին: Այդ հարցում նրան օգնում է Սանահինի վանահայր Գարեգին Սանթունյանը: 3 ամիս Սանահինում մնալուց հետո Գեորգին մեկնում է Էջմիածին, որտեղ ունկնդրում է Ամենայն Հայոց կաթողիկոս Գևորգ 5-րդին՝ եպիսկոպոս Սուրենյանցին:
Սակայն իր այս երազանքը Գյուրջիևը կյանքի չի կոչում, ինչի համար հիմք է հանդիսանում մի հետաքրքիր դրվագ։
«Գյուրջիևն ամառն անցկացնում էր հայրենի ծննդավայրում և մի անգամ հենց մորաքրոջ տան մոտ գտնվող պուրակում տեսնում է, թե ինչպես են երեխաները մի եզդի տղայի գցել կավիճով գծված շրջանի մեջ, և տղան չի կարողանում դուրս գալ այդ շրջանից։ Հենց այդ դրվագի պատճառով է սկսում է հետաքրքրվել թաքնագիտությամբ: Հետագայում պարզում է, որ հենց սիմվոլիզմի ուժն է, որ չի թողել տղային շրջանից դուրս գալ»,- պատմում է գյուրջիևագետը:
Խորանալով հայ առաքելական եկեղեցու դավանանքի մեջ` նա այդպես էլ չի իրականացնում հոգևորական դառնալու իր ցանկությունը, այլ փորձում է ծանոթանալ համաշխարհային այլ կրոններին ու դավանանքներին ու Ալեքպոլում առաջին անգամ 1890-91 թվականներին ստեղծում է «Ճշմարտություն որոնողները» խմբակը:
Գյուրջիևի առեղծվածը. հայրական տունն ու ծնողները
Հայազգի մտավորական, միստիկ, հոգևոր ուսուցիչ, կոմպոզիտոր, պարուսույց և փիլիսոփա Գյուրջիևը ծնվել է Ալեքսանդրապոլում, Տիխայա փողոցի թիվ 35 տանը: Այսօր այն Մատնիշյան փողոցն է: Նրա ծննդյան թվականը ընդունված է համարել 1877 թվականը:
Գուրջիևի գաղափարները լայն ճանաչում են գտել ամբողջ աշխարհում նրա փիլիսոփայությամբ զբաղվող ինստիտուտների ու դպրոցների շնորհիվ, որոնք գոյություն ունեն աշխարհի շատ երկրներում: Գյուրջիևի ուսմունքը շարունակում է հետաքրքրել շատերին:
Այսօր էլ Գյուրջիևի գրքերը մեծ պահանջարկ ունեն աշխարհում` Եվրոպայում, Ասիայում, Ամերիկայում, Ռուսաստանում: Սա բացատրվում է նրա ստեղծած երաժշտության և փիլիսոփայական գաղափարների նկատմամբ աճող հետաքրքրությամբ:
