ԵՐԵՎԱՆ, 3 դեկտեմբերի — Sputnik. Աշխարհի ու Եվրոպայի կրկնակի չեմպիոն Եվգենյա Մեդվեդևա-Բաբասյանը պատմել է, թե որ բարդությունների հաղթահարումն է իրեն հաճույք պատճառում։
«Փաստարկներ և փաստեր» (Аргументы и Факты) պարբերականին տված հարցազրույցում գեղասահորդուհին ասել է, որ իր կյանքի գլխավոր խորհրդատուն մայրն է։ Հենց նա է դստերը տարել սահադաշտ և միշտ անգնահատելի խորհուրդներ տվել։
«Կարծում եմ` հենց նրա շնորհիվ եմ չեմպիոն դարձել։ Չգիտեմ` ինչ կանեի առանց նրա»,- ասել է գեղասահորդուհին։
Մեդվեդև-Բաբասյանը պատմել է, որ 3.5 տարեկանում սահադաշտը երբեք տանջանք չի եղել իր համար և միայն հաճույք է ստացել։ Նա կարծում է, որ սպորտն ամեն դեպքում լավ է ֆիզիկական զարգացման համար, և ճիշտ է, որ այդ տարիքի երեխաների փոխարեն ամեն ինչ որոշում են ծնողները։
«Երևի Մոցարտը Մոցարտ չէր դառնա, եթե նրան փոքր տարիքում չփակեին խորդանոցում և չստիպեին երաժշտությամբ զբաղվել… Կարծում եմ, որ պետք է սեփական ուժերը տարբեր ոլորտներում փորձելու հնարավորություն տալ երեխային և պարզապես հետևել նրա արձագանքին։ Նա անպայման հաջողության կհասնի այն մարզաձևում, որը նրան դուր կգա»,- ասել է գեղասահորդուհին։
Նա խոսել է նաև 18 տարեկան դառնալու մասին` նշելով, որ այդ թիվն ինքնին ոչինչ չի նշանակում, և իր կյանքում ամեն ինչ անփոփոխ է մնացել` և՛ ժամանակացույցը, և՛ նպատակները, և՛ մարդիկ։
Մի անգամ Տատյանա Տարասովան ասել է, որ Եվգենյան երջանկացնում է մարդկանց։ Գեղասահորդուհին իր երջանկությունն է համարում շնորհակալ հանդիսատեսին։
«Շնորհակալություն Տատյանա Անատոլևնային նման գնահատականի համար։ Իսկ ե՞րբ եմ ես ինձ երջանիկ զգում։ Երևի այն պահին, երբ սառցի վրա ցուցադրած իմ ներկայացումը հուզում է մարդկանց»,- ասել է նա։
Նա նաև նշել է, որ գեղասահքը թույլ չի տալիս թուլանալ։
«Իմ կարծիքով, ավելի լավ է ընդհանրապես չթուլանալ։ Հաղթանակից հետո կարող ես այնպես թուլանալ, որ հետո չկարողանաս հավաքվել։ Ինքդ քեզ պետք է հաղթահարես անընդհատ (առանձնակի հաճույք է)։ Յուրաքանչյուր մեդալը հերթական աշխատանքի ավարտն է ու հաջորդի սկիզբը։ Հենց իջնում ես հաղթական պատվանդանից, ամեն ինչ նորից է սկսվում։ Կարծում եմ, որ յուրաքանչյուր պրոֆեսիոնալ մարզիկ կհամաձայնի ասածիս հետ»,- նշել է Մեդվեդևան։
Նրա խոսքով, լավ է, երբ մամուլը մեծ ուշադրություն չի դարձնում մարզիկներին, քանի որ «լռության մեջ աշխատելն ավելի լավ է»։ Գեղասահորդուհին նշել է, որ ինքը սահադաշտ դուրս չի գալիս սեփական PR-ի ու նորություններում հայտնվելու համար։ Պարզապես անում է սիրած գործը։
