ԵՐԵՎԱՆ, 1 դեկտեմբերի — Sputnik. Կոռուպցիայի մեջ մեղադրվելուց հետո Ալեքսանդր Մասլյակովը, որը Ուրախների և հնարամիտների ակումբի (ՈՒՀԱ) հաղորդավարն ու հիմնադիրներից մեկն է, հեռացվել է «Планета КВН»-ի ղեկավարի պաշտոնից: Այս մասին հայտնում է ՌԻԱ Նովոստին՝ հղում կատարելով Transparency International հակակոռուպցիոն միջազգային կազմակերպությանը:
Նշվում է, որ Մասլյակովը խախտել է օրենքը՝ համատեղելով երիտասարդական կենտրոնի ղեկավարի պաշտոնը (պետական ձեռնարկություն) կոմերցիոն կազմակերպության ղեկավարի պաշտոնի հետ:
2014 թ. «Պլանետա ԿՎՆ»-ը (պետական այս կազմակերպության տնօրենը Մասլյակովն է) և «АМиК» ստեղծագործական միությունը, որը պատկանում է Մասլյակովին և նրա ընտանիքին, միասին բացել են «Դոմ ԿՎՆ»–ը (ԲԲԸ): Այստեղ կոնֆլիկտը նրանում է, որ Մասլյակովը որպես պետական կազմակերպության ղեկավար գործարք է կնքել մասնավոր ընկերության հետ, որը հենց իրեն է պատկանում:
Հակակոռուպցիոն հարցերով զբաղվողները նկատել են, որ «Հավանա» կինոթատրոնի շենքը, որը Ռուսաստանի նախագահ Վլադիմիր Պուտինը նվիրել է ՈՒՀԱ-ին` 50-ամյակի կապակցությամբ, նախկինում Մոսկվայի սեփականությունն է եղել: Պետությունից ստացած շենքի արժողությունն ավելի քան 1 մլրդ ռուբլի է, և այն պետությունից ստանալուց հետո անօրինական կերպով ձևակերպվելու արդյունքում հայտնվել է մասնավոր ձեռքերում:
Ալեքսանդր Մասլյակովը երկրի ամենահարուստ հաղորդավարներից է: Մեծ գումար է վաստակում ՈՒՀԱ բրենդի հաշվին: Forbes-ը հաշվել է, որ Մասլյակովի կողմից ղեկավարվող «АМиК»-ի եկամուտը տարեկան կազմում է 3.5 մլն դոլար: Այդքան գումար հավաքվում է ՈՒՀԱ-ի թիմերի հյուրախաղերից և ՈՒՀԱ–ի տարբեր լիգաներում դրանց ելույթներից:
Ռեգիոնալ և կենտրոնական լիգաներում (բառացությամբ հեռուստատեսային ելույթների) հանդես գալու համար յուրաքանչյուր թիմ պետք է վճարի 20 հազար ռուբլի՝ կախված խաղի մակարդակից: Բացի այդ՝ թիմերը պարտավոր են փոխանցել իրենց հյուրախաղերի և կորպորատիվ ելույթների 10-20%-ը:
