ԵՐԵՎԱՆ, 1 դեկտեմբերի — Sputnik. Տարեկան մոտ 120 հազար զբոսաշրջիկ է այցելում Հայաստանի գինու գործարաններ։ Այդ մասին վկայում են Ագրոբիզնեսի հետազոտությունների և կրթության միջազգային կենտրոնի (ICARE) անցկացրած ուսումնասիրության արդյունքները։
Հարցմանը մասնակցել են հանրապետության գինու գործարաններից 20-ը. գրեթե բոլորը գինի են արտադրում արդյունաբերական ծավալներով։
Մեկը մյուսի հետևից գինու գործարանները էքսկուրսիաներ են կազմակերպում և զբոսաշրջիկներին «ճիշտ աստիճանի» հասցնում։ Միջին հաշվարկով, գործարանները (էքսկուրսիաների և այցելությունների ժամանակ) յուրաքանչյուր 100 շշից 7-ը (6,7%) վաճառում են տեղում։ Իսկ 20-ից 12 գործարանում արդեն համտեսի սրահներ են բացվել։
Նշված ընկերություններից յուրաքանչյուրը տարեկան 5900 զբոսաշրջիկ է ընդունում (այսինքն ընդհանուր շուրջ 118 հազար)։ Իսկ գործարաններից մեկը 42 հազարից էլ շատ զբոսաշրջիկ է ընդունել։
Գինու գործարանները հաջողություն են գրանցում նաև արտահանման ոլորտում։ 2014 թվականին անցկացված նմանատիպ հարցման շրջանակում արտահանման մասին հայտնել էր գործարանների 78%-ը, իսկ այսօր` 100%-ը։ Վաճառքների ընդհանուր ծավալում գինու արտահանման մասնաբաժինը 56%-ից աճել է մինչև 59%։
Հետևաբար, ավելացել է նաև գործարանների միջին ծանրաբեռնվածությունը` 53%-ից հասնելով 70%-ի։ Իսկ 2015 թվականի անկումից հետո (հիմնականում ռուսական շուկայում առկա խնդիրների պատճառով) 2016 թվականին արտադրությունը կրկին աճել է 5,9-ից մինչև 6,8 մլն լիտր։
Հայկական գինին արտասահմանում հիմնականում շարունակում են գնել ռուսաստանցիները (80%)։ Կան նաև այլ սպառողներ` ԱՄՆ և ԵՄ մի շարք երկրներ։
