ԵՐԵՎԱՆ, 1 դեկտեմբերի — Sputnik. ԵԱՀԿ/ՄԻԺԻԲ–ը (Մարդու իրավունքների և ժողովրդավարական ինստիտուտների բյուրո) խորհուրդ է տալիս Հայաստանի իշխանություններին հեշտացնել կանանց և սահմանափակ հնարավորություններով անձանց մասնակցությունն ընտրություններին, հաղորդվում է կազմակերպության պաշտոնական կայքում։ Համապատասխան խորհուրդներն առկա են հատուկ զեկույցում, որը ԵԱՀԿ/ՄԻԺԻԲ ներկայացուցիչների խումբը Երևան է բերել նոյեմբերի 29–ից դեկտեմբերի 1–ը։
Բերված փաստաթուղթը` ԵԱՀԿ/ՄԻԺԻԲ զեկույցի վերջնական տարբերակը, վերաբերում է ապրիլի 2–ին Հայաստանում կայացած խորհրդարանական ընտրությունների արդյունքներին։ Զեկույցի հեղինակները խորհուրդ են տալիս անցկացնել խորը և արդիական ընտրական բարեփոխումներ` ուղղված օրենսդրության մեջ թերությունների վերացմանը, որոնք վերաբերում են նաև նախընտրական քարոզարշավների ֆինանսավորմանը, բողոքարկման գործընթացներին, ժամկետներին և այլն։
«ՄԻԺԻԲ–ը նշում է հետագա ջանքերի անհրաժեշտությունը` ուղղված սահմանափակ հնարավորություններ ունեցող անձանց ընտրական իրավունքների սահմանափակումները վերացնելուն, կոչ է անում բարձրացնել ընտրություններում կանանց մասնակցության աստիճանը և բարձրացնել ընտրական գործընթացների կառավարման արդյունավետությունը», – ասվում է ԵԱՀԿ պաշտոնական կայքում։
Զեկույցը և դրա հետևությունները ներկայացվել են Հայաստանի ԱԺ, ԿԸՀ, քաղաքական կուսակցությունների, քաղաքացիական հասարակության և միջազգային հանրության ներկայացուցիչների հետ հանդիպումների ժամանակ։ Բացի այդ, շահագրգիռ կողմերին առաջարկվել են կոնկրետ քայլեր` Հայաստանում ընտրական գործընթացների արդյունավետության բարձրացման ուղղությամբ, ինչպես նաև նշվել են ԵԱՀԿ/ՄԻԺԻԲ հետ համագործակցության պոտենցիալ ոլորտները։
Ապրիլին դիտորդների կողմից բացահայտված խնդիրների շարքում զեկույցի հեղինակները նշել են ընտրողների ձայները գնելու պրակտիկան, վարչական ռեսուրսի օգտագործումը, ինչպես նաև ընտրությունների ինստիտուտների նկատմամբ հասարակական վստահության ցածր մակարդակը։
