Արաբական մի շարք լրատվամիջոցներ հաղորդել են սիրիական հակամարտության կարգավորման ուղղությամբ ընթացող բազմակողմանի գաղտնի բանակցությունների մասին: Sputnik Արմենիայի հետ զրույցում արաբագետ Արմեն Պետրոսյանը վերլուծել է սիրիական ճգնաժամի հնարավոր հանգուցալուծումը։
Նրա դիտարկմամբ, բանակցություններն այսօր իրականացվում են անուղղակի, միջնորդավորված կերպով՝ ԱՄՆ-ի, ՌԴ-ի, Իսրայելի և Իրանի միջև։
«Հետճգնաժամային Սիրիան պետական կառուցվածքի առումով լինելու է դաշնության կամ համադաշնության ձևով. հնարավոր է՝ ինքնավարություն տրամադրվի երկրի քրդական և դրուզական շրջաններին: Ինչ վերաբերում է իրաքյան Քրդստանին ու այնտեղ ծավալվող գործողություններին, ապա, ըստ Իրաքից ստացվող տեղեկությունների, ամերիկյան զինուժը (մոտ 50 համերներով) մտել է Քիրքուք»,- ասում է Պետրոսյանը։
Ըստ նրա, սա համընկնում է ամերիկյան ոչ միայն քաղաքական, այլ տնտեսական շահերին, քանի որ Քիրքուքը հարուստ է էներգակիրներով: Այս պահին ԱՄՆ-ն ազդեցություն ունի իրաքյան կենտրոնական իշխանությունների ու քրդական հատվածի վրա։ Իրաքում կարողանում է սեփական զինուժը կենտրոնացնել այն հատվածներում, որոնք Վաշինգտոնի համար կարևորություն են ներկայացնում ու դա անում է լրացուցիչ ռեսուրս չվատնելով, ավելին` առանց սեփական զինվորի կորստի։
