ԵՐԵՎԱՆ, 30 նոյեմբերի — Sputnik. Վրացական ԶԼՄ-ներում և սոցցանցերում քննարկում են ԱՄՆ-ում տեղի ունեցած պսակադրության արարողությունը, որի «հերոսները» տղամարդիկ են. «ԼՀԲՏ Վրաստան»-ի նախկին գործադիր տնօրեն Դավիթ Միխայիլ Շուբլաձեն ամուսնացել է տղամարդու հետ։
Օգտատերերն անմիջապես արձագանքել են այս իրադարձությանը և սկսել են մեկնաբանություններ գրել, երբ Շուբլաձեն Facebook սոցցանցի իր էջում հարսանեկան արարողության լուսանկար է հրապարակել։ Sputnik Գրուզիան ներկայացրել է օգտատերերի մեկնաբանությունները։
Ամուսնական զույգն արարողությանը ներկայացել է վրացական ավանդական հագուստով (չոխա), իսկ պսակադրության արարողությունը կին է անցկացրել։
Լուսանկարն ուղեկցվել է ժպիտներով ու հետևյալ գրությամբ. «Կորկոտայի և Բրեգաձեի նկատմամբ ունեցած մեծ սիրով»։ Աշխարհագրական դիրքը` ԱՄՆ։ Այդպիսով, Շուբլաձեն դիմել է «Վրացական քայլերթ» շարժման կազմակերպիչներ Գիա Կորկոտաշվիլիին և Սանդրո Բրեգաձեին, ովքեր Վրաստանում համասեռականության քարոզչության ակտիվ հակառակորդներ են:
Ավելի ուշ հայտնի է դարձել, որ Շուբլաձեի ընտրյալն իտալացի Մեթյու Գեդոլֆոն է։
Մեկնաբանություններում ընկերները շնորհավորել են զույգին և երջանկություն մաղթել նրանց։
Ի՞նչն է ամենից շատ զայրացրել օգտատերերին` տղամարդկանց ամուսնությո՞ւնը, թե՞ այն հագուստը, որ նրանք ընտրել են պսակադրության համար։
Մեկնաբանություններից դատելով` մեղադրանքներն ու քննադատություններն ավելի շատ ուղղված են հենց հագուստի ընտրությանը։ Օգտատերերին զայրացրել է այն փաստը, որ ոչ ավանդական սեռական կողմնորոշում ունեցող զույգն ավանդական վրացական հագուստով է պսակադրվել։
«Ես համարում եմ, որ բոլորն անձնական կյանքի իրավունք ունեն, և այն, ինչ անում է մարդը, իր անձնական գործն է, բայց չոխան վրացական արիության խորհրդանիշն է, արժանապատվություն է խորհրդանշում, և այս պարագայում ես կարծում եմ, որ նման արարքով պարզապես ոտնահարել են վրացական արժանապատվությունն ու խորհրդանիշները», — գրել է ირმა რუხაძე օգտատերը։
«Սա իմ ազգային արժանապատվությանը հասցրած վիրավորանք է», — գրել է Lorentso Lemonjava-ն։
Որոշ օգտատերեր հումորով են մոտեցել թեմային։
«Սպիտակ չոխայովը երևի հարսն է, իսկ սևովը` երևի փեսան», — գրել է ნინო ადამაშვილი-ը։
«Հըմ… Տղամարդն ամուսնանում է տղամարդու հետ, իսկ ամուսնացնում է նրանց կինը… Սա ոչ թե երկիր է, այլ սյուրռեալիզմ…», — գրել է Էոլաս Լուցին։
«Ես ընդհանրապես կողմ եմ, որ «սեռական փոքրամասնությունների» ամուսնության արարողության պարտադիր և պաշտոնական ատրիբուտ, նույնիսկ համազգեստ դառնա… չոխան…», — գրել է Gaga Gobronidze-ն։
Օգտատերերի մի մասն էլ պաշտպանել է նորապսակներին և մյուսներին հորդորել ավելի մեծ հանդուրժողականություն ցուցաբերել սեռական փոքրամասնությունների ներկայացուցիչների նկատմամբ։
