ԵՐԵՎԱՆ, 30 նոյեմբերի — Sputnik. Վրաստանի սահմանադրական դատարանը մարիխուանայի օգտագործման համար քրեական պատիժը վերացրել է: Բավարարվել է «Գիրչի» ընդդիմադիր կուսակցության ներկայացուցչի հայցը, որը մարիխուանայի կրկնակի օգտագործման համար պահանջում էր պարզեցնել քրեական պատիժը և այդպիսով ապաքրեականացնել այն, հայտնում է Sputnik Գրուզիան:
Այս որոշումը դատարանը բացատրել է այսպես` մարիխուանայի օգտագործումը վտանգավոր չէ հանրային շահերի համար, քանի որ տվյալ դեպքում փոքր է թմրանյութի տարածման վտանգը։
Դատարանի որոշման համաձայն` մարիխուանայի օգտագործումը քրեական հանցագործություն չի համարվի։
Հայցվոր Գիվի Շանիձեն իր որոշումը հիմնավորել է նրանով, որ գործող նորմը չի համապատասխանում Վրաստանի սահմանադրության 16-րդ հոդվածին` «Յուրաքանչյուրն իր անձի ազատ զարգացման իրավունք ունի»։
Հայցի համաձայն` մարիխուանան կարող է օգտագործվել ինչպես բժշկական նպատակներով, այնպես էլ ժամանցի, իսկ մարդն իրեն հարմար հանգստի ձև ընտրելու իրավունք ունի։
Մինչև 5 գրամ չորացրած և մինչև 10 գրամ հում մարիխուանան դիտարկվում է որպես անձնական օգտագործման թմրանյութ։
