ԵՐԵՎԱՆ, 30 նոյեմբերի — Sputnik. Առաջին հեռուստաազդանշանը եղել է հենց Արարատ լեռից, հայտնել է հաղորդավար և շոումեն Իվան Ուրգանտը Հայաստանի հանրային հեռուստաընկերությանն ուղղված (որը չորեքշաբթի տոնել է 61-ամյա հոբելյանը) կատակ-շնորհավորանքի ժամանակ։
Հայաստանի հանրային հեռուստաընկերության Facebook սոցցանցի պաշտոնական էջում Ուրգանտի շնորհավորանքով տեսանյութ է հրապարակվել։
«Բացառիկ իրադարձություն է տեղի ունեցել, երեկ ես տոլմա էի ուտում և տոլմայում այսպիսի գրություն հայտնաբերեցի. «Հայաստանի հեռուստատեսությունը 61 տարեկան է դառնում»։ Ինչպե՞ս հասկանալ։ Չէ՞ որ սա տոն է բոլորիս համար, այն մարդկանց համար, ովքեր մեծարում են և հավատում, որ առաջին հեռուստատեսային ազդանշանը հենց Արարատ լեռից է եկել», — ասել է հաղորդավարը։
Ռուսական «Առաջին ալիքի» հաղորդավարները տոնի առթիվ, Ուրգանտի խոսքով, բաժակները լցրել են թթի օղիով և խմել հեռուստատեսությունում աշխատող հայաստանցի գործընկերների կենացը։
Ուրգանտը երջանկություն, առողջություն է մաղթել հայ գործընկերներին` նրանց լավ տեսախցիկներ, նոր օբյեկտիվներ և սթափ օպերատորներ մաղթելով։
Նա կատակով նշել է, որ «կցանկանար հայերեն ինչ-որ բան ասել, բայց իր կրոնը թույլ չի տալիս»։
Հայաստանի հանրային հեռուստաընկերությունը կամ Հայաստանի «Առաջին ալիքը» հիմնվել է 1956 թվականի նոյեմբերի 29-ին։
