ԵՐԵՎԱՆ, 30 նոյեմբերի — Sputnik. Ոչ վտանգավոր իրավախախտումների համար պետք չէ ազատազրկել, կառավարության այսօրվա նիստում հայտարարեց ՀՀ վարչապետ Կարեն Կարապետյանը։
«Հանցակազմերի մի մասը չունեն հանրային վտանգավորության բարձր աստիճան, ինչպես նաև դրանց իրավական այլ մեխանիզմների միջոցով արձագանքելու հնարավորություն»,- ասաց նա:
Նման մոտեցումն արդարացրել է հարկերը չվճարելու համար քրեական պատասխանատվության մեղմացումը, հիշեցրեց նա։
2017 թվականի փետրվարին քրեական պատասխանատվության շեմը երկու միլիոնից բարձրացվեց մինչև 4 միլիոն դրամ։ Այժմ պետք է ուսումնասիրել ապաքրեականացման մյուս հնարավորությունները ինչպես բիզնեսի, այնպես էլ քաղաքացիների համար, ընդգծեց վարչապետը։
Կարապետյանը տնտեսական զարգացման և ներդրումների, արդարադատության նախարարներին, ինչպես նաև Պետական եկամուտների կոմիտեի նախագահին հանձնարարեց երկու ամսյա ժամկետում համատեղ մշակել և կառավարության աշխատակազմ ներկայացնել Քրեական օրենսգրքով նախատեսված տնտեսական գործունեության ոլորտում առկա այն հանցակազմերի ապաքրեականացման վերաբերյալ իրավական ակտերի նախագծեր, որոնք ունեն հանրային վտանգավորության ցածր աստիճան, առկա են դրանց վարչական վարույթի քաղաքացիական դատավարության շրջանակներում լուծման արդյունավետ հնարավորությունները:
