ԵՐԵՎԱՆ, 30 նոյեմբերի — Sputnik. ՀԱՊԿ անդամ-պետությունների ղեկավարները հինգշաբթի Մինսկում կայացած գագաթնաժողովում հռչակագիր են ընդունել, որում դեմ են հանդես եկել միջազգային վեճերը «գունավոր հեղափոխությունների» և «հիբրիդային պատերազմների» միջոցով լուծելուն։
Գագաթնաժողովի միջոցառումներին մասնակցելու համար Բելառուսի մայրաքաղաք են մեկնել արտաքին գործերի և պաշտպանության նախարարներ, անվտանգության խորհուրդների ղեկավարներն ու անձամբ պետությունների ղեկավարները։ Մինսկի հանդիպման հիմնական արդյունքները ներկայացնում է Sputnik Բելառուսը։
Ահաբեկիչների ընդհանուր ցուցակ է կազմվել
Ավելի վաղ փորձագետները բազմաթիվ անգամ բարձրացրել են պայմանագրի անդամ-պետությունների համար ահաբեկչական կազմակերպությունների միասնական ցուցակի ներդրման անհրաժեշտության հարցը։ Մինսկում լուծվել է այդ հարցը։
«Այսօր աշխարհում որոշ պետություններ, կազմակերպություններ ահաբեկիչներին բաժանում են լավերի ու վատերի` խոսելով այն մասին, որ պետք է համագործակցել լավերի հետ վատերի դեմ պայքարում (…) Ահաբեկչական վտանգ կա, որի դեմ պայքարել է պետք։ Կարծում եմ, որ մենք այդ հարցում ևս լուրջ առաջընթաց ենք արձանագրել, սակայն դեռ շատ անելիքներ կան», — Մինսկում նշել է Բելառուսի ԱԳՆ ղեկավար Վլադիմիր Մակեյը։
Նախարարն ընդգծել է, որ ՀԱՊԿ երկրները միատեսակ հայացքներ ունեն նոր մարտահրավերների դեմ պայքարում պետությունների միջև սերտ համագործակցության անհրաժեշտության գործում։
Անցկացվելու է «Վարձկան» օպերացիան
ՀԱՊԿ երկրներում ահաբեկիչների դեմ պայքարը չի սահմանափակվում ցուցակներ կազմելով և փորձի փոխանակմամբ։ Պետությունները հաջորդ տարի մտադիր են «Վարձկան» անվանումը կրող ընդհանուր հակաահաբեկչական զորավարժություններ անցկացնել։
«Սա նույնպես կապված է «Իսլամական պետության» շուրջ ստեղծված իրավիճակի հետ։ Բոլորի համար հասկանալի է, թե մեր պետությունների քանի ներկայացուցիչ կա Սիրիայի, Աֆղանստանի և այլ պետությունների տարածքում, որտեղ զբաղվում են ահաբեկչական գործունեությամբ», — հինգշաբթի հայտնել է ՀԱՊԿ գլխավոր քարտուղարի տեղակալ Վալերի Սեմերյակովը։
«Վարձկան» օպերացիայի անցկացման հստակ ամսաթվերը դեռ որոշված չեն, բայց արդեն հայտնի է, որ այդ գործողությունների ժամանակ երկրները մշակելու են ահաբեկչական խմբավորումների, միայնակ ահաբեկիչների և չարագործների միավորումների սպառնալիքներին դիմակայելու միջոցներ։
Պայմանավորվել են հանդես գալ գունավոր հեղափոխությունների դեմ
ՀԱՊԿ երկրների ղեկավարների ընդունած վերջնական հռչակագրի համաձայն` պետությունները դեմ են միջազգային վեճերում սպառնալիքների և ուժի կիրառմանը։
«Մենք չենք ընդունում միջպետական խնդիրները և միջազգային վեճերը սպառնալիք կամ ուժ կիրառելով, միջազգային և միջեկեղեցական անհանդուրժողականության հրահրման և պետականությունն այլ մեթոդներով քանդելու ճանապարհով լուծելու ցանկացած փորձ, այդ թվում «գունավոր հեղափոխությունների» և «հիբրիդային պատերազմների» տեխնոլոգիաների կիրառմամբ», — նշված է հռչակագրում։
Բացի այդ, ՀԱՊԿ-ն կոչ է անում շուտափույթ կարգավորել Սիրիայում և Արցախում առկա իրավիճակը։
Կողմերը հաստատել են, որ հավատարիմ են հակամարտությունների կարգավորման և լուծման քաղաքական ու դիվանագիտական միջոցների գերակայության սկզբունքին։
«Միջազգային հարաբերություններում կոնֆլիկտային ներուժի պահպանման պայմաններում մեր պետությունները համոզիչ ջանքեր են ձեռնարկել, որպեսզի ՀԱՊԿ-ն ի վիճակի լինի երաշխավորված պատասխան ունենալ իր պատասխանատվության գոտում իրավիճակն ապակայունացնելու, խաղաղությունն ու անվտանգությունը խախտելու ցանկացած փորձի համար», — ընդգծված է փաստաթղթում։
ՀԱՊԿ-ն ստեղծվել է 2002թ.-ին, այժմ կազմակերպության կազմում վեց պետություն է ընդգրկված`Հայաստանը, Բելառուսը, Ղազախստանը, Ղրղըզստանը, Ռուսաստանը և Տաջիկստանը։ ՀՀ-ն ՀԱՊԿ-ի պայմանագիրը ստորագրել է 1992 թվականի մայիսի 15-ին։ Հայաստանը ՀԱՊԿ-ում նախագահում է 2015 թվականի սեպտեմբերից:
