ԵՐԵՎԱՆ, 30 նոյեմբերի — Sputnik. Ռուսաստանի Վոլգոգրադի մարզի Գորոդիշենսկի շրջանի Պեսկովատկա ագարակում 1942 թվականին զոհված խորհրդային զինվորների պատվին հուշատախտակ է բացվել։ Այս մասին հայտնում են ադրբեջանական լրատվամիջոցները։
Հուշատախտակի վրա գրված են հետևյալ անունները` Արմազ Ասատուրի Սարկիսով, Խալվա Իվանի Կիկալեշվիլի, Հովհաննես Մարտիրոսի Հովհաննիսյան, Ահմեդ Ալիի Բաբաև, Ահմեդ Ալիի Գամբաբեդով և Վիկտոր Սեմյոնի Սախարաձե։
Ստալինգրադի ճակատամարտի մասին պատմող գրքի հեղինակ Ալիմարդան Նասիրովը նշել է, որ չնայած սառնամանիքին` հուշատախտակի բացման արարողությունն անցել է բարձր մակարդակով։
Զինվորներին նվիրված հուշատախտակը նախաձեռնել է այդ սխրանքը հավերժացնող կոմիտեի ղեկավար Սերգեյ Զվյագինը, որը սրտի կաթված է ստացել և այդ պատճառով չի մասնակցել միջոցառմանը։
«Թեև այդ սխրանքն իրագործել են ադրբեջանցի, հայ և վրացի ժողովուրդների ներկայացուցիչները, այդուամենայնիվ հայկական ու վրացական սփյուռքի ներկայացուցիչներից որևէ մեկը չի մասնակցել միջոցառմանը։ Ես` ադրբեջանցիս, ստիպված եղա հարգանքի տուրք մատուցել ոչ միայն իմ հայրենակիցներին, այլև հայերին ու վրացիներին»,- ասել է նա։
Ըստ Նասիրովի` նրանք այն մարդիկ են, որոնք ժամանակին մարտնչել են ընդհանուր հայրենիքի` ԽՍՀՄ-ի համար։
