ԵՐԵՎԱՆ, 30 նոյեմբերի — Sputik. «Armenia» ավիաընկերության օդաչու Մարտին Հարությունյանը հրամանատարի կարգավիճակում առաջին թռիչքը (Երևան-Մինվոդի-Երևան չվերթ) իրականացրեց նոյեմբերի 30-ին։
27 տարեկանում հրամանատար դարձած օդաչուն լրագրողների հետ հանդիպմանը հայտնեց, որ ստացած գիտելիքները պարտավորեցնող են։
«Հասկանում ես, որ ամբողջ անձնակազմը, ինչպես նաև ուղևորները նստած են քո թիկունքում ու նրանց կյանքը քո ձեռքերում է։ Այսինքն, շատ պատասխանատու գործ է, որին պետք է գիտակցաբար վերաբերվել։ Չափազանց հուզված եմ նոր կարգավիճակում թռիչք ու վայրէջք կատարելուց հետո»,- ասաց Հարությունյանը։
Օդաչուն 25 տարեկանից քաղավիացիայում է։
«Հրամանատարի գիտելիքներ ստանալու համար պետք է պրոֆեսիոնալ լինել, ճիշտ կողմնորոշվել և կարևոր որոշումներ կայացնել»,- ավելացրեց Հարությունյանը։
«Armenia» ավիաընկերության գլխավոր տնօրեն Ռոբերտ Օգանեսյանն էլ ր հերթին նշեց, որ ընկերությունը երկու տարվա ընթացքում մասնագետներ է պատրաստել, և այժմ արդյունքն ակնհայտ է։
«Նա Մինվոդի տարավ 80 ուղևորի և Հայաստան բերեց 90-ին… Թռիչքից առաջ մենք հայտարարեցինք, որ երիտասարդ օդաչուն իր առաջին չվերթն է կատարում, և բոլոր ուղևորները նրան շնորհավորեցին»,- նշեց Օգանեսյանը։
Նա հայտնեց, որ առաջիկա երեք տարում ծրագրում են առնվազն երեք հրամանատար նվիրել ինչպես ավիաընկերությանը, այնպես էլ Հայաստանին։
Ավիաընկերության առաջին հրամանատարը Հովհաննես Խաչատրյանն է։
«Armenia»-ն ներկա փուլում չվերթեր է իրականացնում նաև դեպի Մինվոդի, Թել Ավիվ, Բեյրութ: Ավիաընկերությունը մտադիր է կանոնավոր չվերթեր գործարկել նաև նոր ուղղություններով։
«Armenia»-ի ավիապարկում երկու ինքնաթիռ կա` Boeing 737-500, Boeing 737-700։ Ընկերությունն ունի 53 աշխատակից։
Ավիաընկերության հիմնադիրներն են Աշոտ Թորոսյանը (51 տոկոս բաժնետոմս), Թամազ Գաիաշվիլին (24 տոկոս) և Ռոբերտ Օգանեսյանը (25 տոկոս): Հայաստանն ազգային ավիափոխադրողից զրկվել է 2013 թվականին` «Արմավիա» ընկերության սնանկացումից հետո:
Հայրենական ավիաշուկայում այսօր երկու հայկական ընկերություն է գործում` «Armenia»-ն և «Տարոն-ավիան»։
