Հայաստանը բացառություն չէ։ Աշխարհի շատ երկրներում ընտանեկան բռնությունների և խտրականությունների կանխարգելման մասին օրենքների օգտին ակտիվ քարոզչական գործունեություն են ծավալում հատկապես հասարակական կազմակերպությունները, ովքեր նյութական շահագրգռություն ունեն։
Ասում է «Միջազգային հումանիտար զարգացման» ՀԿ նախագահ Արման Ղուկասյանը։
«Այդ կազմակերպություններն ունեն կոնկրետ հովանավորներ, որոնք դրամաշնորհների տեսքով են ի հայտ գալիս։ Կոնկրետ Հայաստանում «Բաց հասարակության հիմնադրամները» տասնյակ հազարավոր դոլարների ֆինանսավորում է տրամադրում այդ ՀԿ–ներին»,– ասում է Ղուկասյանը։
«Միջազգային հումանիտար զարգացման» ՀԿ–ն Հայաստանում հարցում է իրականացրել և պարզել, որ ի տարբերություն ընտանեկան բռնությունների մասին օրինագծի, խտրականությունների կանխարգելման մասին օրենքի նախագծի մասին հայ հասարակությունն այնքան էլ տեղեկացված չէ։
Բայց Արման Ղուկասյանի համոզմամբ` այն ևս պակաս աղմկահարույց նախագիծ չէ, որ դարձյալ կապվում է ԵՄ պայմանագրի ստորագրման հետ։
