ԵՐԵՎԱՆ, 29 նոյեմբերի – Sputnik. Հայաստանի դիվանագիտությունը Սևծովյան տնտեսական համագործակցության ԽՎ-ի նիստի շրջանակներում տեղի ունեցած միջադեպի վերաբերյալ պատասխան ունի, Sputnik Արմենիայի թղթակցին հայտնել է ՀՀ ԱԺ արտաքին հարաբերությունների հանձնաժողովի նախագահ Արմեն Աշոտյանը:
Կիևում անցկացվող ՍԾՏՀ ԽՎ նիստի ժամանակ հայկական պատվիրակությունը լքել է դահլիճը: Պատճառը` առանց հայկական պատվիրակության հռչակագրում որոշ փոփոխություն մտցնելու վերաբերյալ քննարկումն էր:
Վեհաժողովի 50–րդ հոբելյանական նիստի բացման սկզբում, երբ պատվիրակությունների անդամները մոտ մեկ ժամ սպասում էին դահլիճում, պարզվեց, որ բոլոր պատվիրակությունների ղեկավարները ՍԾՏՀ ԽՎ գլխավոր քարտուղարի և Ուկրաինայի պատվիրակության ղեկավարի նախաձեռնությամբ առանձնացել ու ինչ-որ հարց էին քննարկում: Այդ քննարկմանը չէր հրավիրվել միայն Հայաստանի Հանրապետության Ազգային ժողովի պատվիրակության ղեկավարը: Քննարկումը նախաձեռնել էին ՍԾՏՀ ԽՎ գլխավոր քարտուղարը, Ադրբեջանի ներկայացուցիչ Ասաֆ Գաջիևը և Ուկրաինայի պատվիրակության ղեկավար Լյուդմիլա Դենիսովան:
Ավելի ուշ պարզվեց, որ վերոհիշյալ քննարկման արդյունքում հռչակագրի մեջ տարածաշրջանում առկա հակամարտությունների վերաբերյալ մի փոփոխություն է մտցվել:
Աշոտյանը խորին ափսոսանք է հայտնել նման վարքագծի համար: Նա կարծում է, որ ՍԾՏՀ ԽՎ-ն, որպես տնտեսական կառույց, խախտել է իր մանդատը `միջամտելով քաղաքական հարցերի: Խախտվել է նաև խորհրդարանական դիվանագիտության ոգին:
«Հայկական դիվանագիտությունը անհրաժեշտ միջոցներ ունի, նման գործողությունները չեզոքացնելու համար: Բայց, այնուամենայնիվ, ՍԾՏՀ ԽՎ պարտավոր է վերանայել իր գործողությունները», — նշել է Աշոտյանը:
Ավելի վաղ ՀՀ ԱԺ մամուլի ծառայությունը հայտնել էր, որ հայկական պատվիրակությունը բոյկոտել է ՍԾՏՀ ԽՎ հիսուներորդ հոբելյանական նիստն ու հեռացել դահլիճից, քանի որ նա չէր հրավիրվել տարածաշրջանում առկա հակամարտությունների վերաբերյալ հռչակագրում արվող փոփոխությունների քննարկմանը:
Փոփոխությունների և ընդհանուր հռչակագրի բովանդակության մասին դեռ չեն հայտնում, այդ թվում նաև ՍԾՏՀ ԽՎ պաշտոնական կայքում: Նշվում է, որ փոփոխությունն «ամբողջովին հակասում է միջազգային իրավունքի՝ ուժի և ուժի սպառնալիքի չկիրառման, տարածքային ամբողջականության և ժողովուրդների ազատ ինքնորոշման իրավունքի սկզբունքներին»:
