ԵՐԵՎԱՆ, 28 նոյեմբերի — Sputnik. Այսօր՝ նոյեմբերի 28-ին, ավազակային հարձակում է տեղի ունեցել Երևանում։ Ժամը 19։15-ի սահմաններում անհայտ անձը հրազենի նմանվող ատրճանակով ներս է մտել Մաշտոցի պողոտայի 7/5 հասցեում գործող varks.am-ի մասնաճյուղ և աշխատակցից հափշտակել է խոշոր չափի գումար։ Այս մասին հայտնում է shamshyan.com-ը։
«Այս պահին դեպքի վայրում զննություն են կատարում Ոստիկանության փորձաքրեագետները և Հայաստանի քննչական կոմիտեի Երևան քաղաքի քննչական վարչության Կենտրոն և Նորք Մարաշ վարչական շրջանների քննչական բաժնի քննիչները՝ ավագ քննիչ Հարութ Մանուկյանի գլխավորությամբ, որի կողմից փաստի առթիվ նյութեր են նախապատրաստվում»,- նշված է կայքում։
Ոստիկանությունն ու քննչական բաժինը ձեռնարկում են անհրաժեշտ օպերատիվ-հետախուզական և քննչական համատեղ գործողություններ՝ հանցագործությունը բացահայտելու, կատարողին հայտնաբերելու ուղղությամբ։
Կայքի տեղեկություններով՝ ավազակային հարձակումը տեսաձայնագրել են նշված տարածքում տեղադրված տեսախցիկները։
