ԵՐԵՎԱՆ, 28 նոյեմբերի — Sputnik. Ներկայիս Թուրքիայի տարածքում գտնվող Մալաթիա քաղաքի Ջեմալ Գյուրսել թաղամասում բնակվող ալևիներն օրերս հայտնաբերել են, որ ինչ-որ մարդիկ իրենց դռներին կարմիր ներկով տարբերակիչ նշաններ են արել։ Նշաններն ինչ-որ առումով խաչ են հիշեցնում, ինչը տեղի բնակիչներին առիթ է տվել եզրակացնելու, որ այդկերպ իրենց նշել են իբրև այլադավանների։
«Դա բողոքի մեծ ալիք բարձրացրեց ալևիների շրջանում, որովհետև նրանք վախեցած են, նախկինում էլ է պատահել, երբ նախապես տարբերակված տների վրա հարձակումներ են գործել։ Հետևաբար, մարդիկ չէին կարող չանհանգստանալ, երբ իրենց տների վրա նման նշաններ տեսան»,- անդրադառնալով Մալաթիայում տիրող տրամադրություններին` ասաց «Ակոս» թերթի հայկական բաժնի խմբագրապետ Բագրատ Էստուկյանը։
Նրա դիտարկմամբ, տեղի ունեցածը ոչ թե կոնկրետ անձանց դեմ ուղղված քայլեր են, այլ ավելի շատ զանգվածներին ահաբեկելու։ Դրանով ցանկացած այլակարծություն լռեցնելու նպատակ է հետապնդվում։
«Ազգայնականների զոհ դառնալու վտանգը Թուրքիայում միշտ կա։ Միայն այս ժամանակի խնդիրը չէ։ Ամեն ժամանակ որոշ կրկնություններով, տարբեր դրսևորումներով միշտ եղել է և կա»,- ասաց Էստուկյանը։
Մալաթիայում ստեղծված լարված վիճակին ու մասնավորապես ալևի բնակչության բնակելի տների վրա արված տարբերանշանների խնդրին երեկ անդրադարձել է նաև Թուրքիայի իշխանությունը։
Թուրքիայի փոխվարչապետ Ռեջեփ Աքդաղը խոստացել է, որ միջադեպը կքննեն իրավապահները։ Նա նաև ավելացրել է, որ իրենց երկրում թուրքերի և քրդերի միջև որևէ խնդիր չկա ու չի էլ եղել, և որ տեղի ունեցածը պարզապես սադրանք է:
Ալևիները բնակվում են հիմնականում Թուրքիայի հարավային լեռնային շրջաններում ու Սիրիայի հյուսիս-արևմուտքում։ Համարվում են իսլամի շիա ուղղությանը դավանող համայնք, մինչդեռ մի շարք ալևիների կողմից այս տեսակետը չի ընդունվում: Ոմանք պնդում են, որ ալևիզմը, որին դավանում են միլիոնավոր քրդեր, առանձին կրոն է, որն իր մեջ սինթեզում է մահմեդականության, քրիստոնեության և անգամ հեթանոսության որոշ տարրեր:
