ԵՐԵՎԱՆ, 28 նոյեմբերի — Sputnik. Հայաստանի մաքսային ծառայությունը ներկրողներին նախապես կտեղեկացնի ապրանքների մաքսազերծման մեթոդի մասին։ Այս մասին լրագրողներին ասաց ՀՀ կառավարությանն առընթեր պետական եկամուտների կոմիտեի փոխնախագահ Վախթանգ Միրումյանը։
Եթե ներկրողը կցանկանա նախապես իմանալ, թե մաքսատունն ինչ մեթոդով է գնահատելու ապրանքն ու հաշվելու տուրքերը, պետք է էլեկտրոնային եղանակով հայտարարագիր ուղարկի։ Այդ տարբերակն ամրագրված է Եվրասիական տնտեսական միության նոր մաքսային օրենսգրքում, որն ուժի մեջ կմտնի 2018 թվականի հունվարի 1-ից։
Երկրի ու ներկրողի հուսալիությունը գնահատելուց հետո մաքսայինները կորոշեն` մաքսազերծման ժամանակ վստահե՞ն հայտարարագրին, թե՞ իրենք հաշվեն ապրանքի արժեքը։
Մաքսայինի որոշումը չի փոխվի նաև նույն ապրանքի հաջորդ ներմուծման ժամանակ։ Եթե, իհարկե, երկրի անվանումը, ներկրողն ու ապրանքային կոդը նույնը լինեն։
Գործարարը, իմանալով, թե ինչպես է մաքսազերծվելու ապրանքը, կկարողանա նախապես պատրաստվել վճարումներին ու մաքսային գործընթացներին։
