ԵՐԵՎԱՆ, 28 նոյեմբերի — Sputnik. Իրանի Իսլամական Հանրապետությունը շնորհակալ է Հայաստանին միջազգային ասպարեզում իր սկզբունքներին աջակցելու համար, Երևանում իր հայ գործընկեր Էդվարդ Նալբանդյանի հետ համատեղ մամուլի ասուլիսի ժամանակ ասաց ԻԻՀ արտգործնախարար Մուհամադ Ջավադ Զարիֆը։
«Հայաստանի և Իրանի քաղաքական և տնտեսական հարաբերությունները վերջին տարիներին բարձր մակարդակի վրա են գտնվում։ Հայաստանի հետ համագործակցության կարևորագույն ոլորտներից են էներգետիկան, տարանցումն ու բնապահպանությունը։ Մենք կարևորում ենք նաև համագործակցությունը գիտության և տեխնոլոգիաների ոլորտում», – ասաց Զարիֆը։
Զարիֆի խոսքով` երկրները համատեղ աշխատում են, որպեսզի պահպանվի խաղաղությունն ու կայունությունը տարածաշրջանում։
Էդվարդ Նալբանդյանն իր հերթին նշեց, որ երկու երկրների հարաբերությունները ջերմ են, դրանք պահպանվում են բարձր մակարդակով հանդիպումներ անցկացնելով։
«Մեծ ներուժ կա, և մենք մտադիր ենք այն զարգացնել, խորացնել և ընդլայնել հարաբերությունները», – ասաց Նալբանդյանը։
Նա ուշադրություն հրավիրեց այն հանգամանքին, որ ԵԱՏՄ–ի և Իրանի միջև հարաբերությունների զարգացումը կարող է նպաստել հայ-իրանական տնտեսական կապերի խորացման առաջընթացին։
Նալբանդյանը նաև նշեց, որ Զարիֆի հետ քննարկել է տարածաշրջանային և միջազգային հարցեր, այդ թվում` արցախյան հակամարտության կարգավորումը։
«Կարևորում ենք Իրանի հավասարակշիռ և հետևողական մոտեցումը` միջազգային իրավունքի նորմերի հիման վրա արցախյան հակամարտության բացառապես խաղաղ կարգավորման հարցի վերաբերյալ», – ասաց Նալբանդյանը։
Իրանի արտգործնախարար Մուհամադ Զարիֆը Երևան է ժամանել նոյեմբերի 28-ին ՀՀ արտգործնախարար Էդվարդ Նալբանդյանի հրավերով։ Նրա այցի շրջանակներում հանդիպում է նախատեսվում նաև ՀՀ նախագահ Սերժ Սարգսյանի և վարչապետ Կարեն Կարապետյանի հետ։
