ԵՐԵՎԱՆ, 27 նոյեմբերի — Sputnik. Որոշ մանրամասներ են հայտնի դարձել աղմկահարույց հանցագործությունից, որի զոհ են դարձել երեք մարդ, որոնց թվում է նաև ձեռնարկատեր, տեղի հեղինակություն Անդրեյ Սարայանը։
Նոյեմբերի 26-ի լույս գիշերը «Աստորիա» ռեստորանում, որը գտնվում է Արմավիրի կենտրոնում (Կրասնոդարի երկրամաս), փոխհրաձգություն է տեղի ունեցել։ Հյուրերի միջև ծագած վեճը (ԶԼՄ-ների տվյալով` կնոջ պատճառով) սուր կոնֆլիկտի է վերածվել, որն ավարտվել է կրակոցներով։ Փոխհրաձգությանը մասնակցել են 4 մարդ, որոնցից 3-ը մահացել են, իսկ 4-րդը փախել են դեպքի վայրից։ Ինչպես հայտնում է Կրասնոդարի երկրամասի քննչական կոմիտեի քննչական վարչությունը, ռեստորանում տեղի ունեցած վեճի առթիվ քրեական գործ է հարուցվել ՌԴ ՔՕ 105-րդ հոդվածի 2 մասի («Սպանություն»)։
Փոխհրաձգությանը մասնակցել են «Վիտյազ» անվտանգության գործակալության պետ Սերգեյ Բորովոյը, Ռոսգվարդիայի գնդապետ Պյոտր Լոմակինը, գործարար (որոշ տվյալների համաձայն` քրեական հեղինակություն) Անդրեյ Սարայանը և նրա ընկեր Մուխտար Մալսյուգենովը։
Ինչպես հայտնում է «ԱՊ Արմավիր» Telegram-ալիքը, Բորովոյը Սարայանի հետ վիճաբանության ժամանակ, Լոմակինի մեջքի հետևում կանգնած, հանել է ատրճանակն ու կրակել Սարայանի գլխին։ Այնուհետև Սարայանի ընկերը (այժմ որոնվող Մասլյուգենովը) դուրս է եկել ռեստորանից և վերադարձել «Սայգա» հրացանով, որով էլ սպանել է Բորովոյին և Լոմակինին։
Ինչպես հայտնել է ռեստորանի տնօրեն Օլեգ Չեբոտարյովը, ներկա գտնվող մարդիկ նույնիսկ չեն հասցրել հասկանալ, թե ինչի պատճառով է սկսվել կրակոցը։
«Երկու հարբած, ոչինչ չհասկացող մարդիկ սկսեցին կրակել միմյանց վրա։ Մեկը սպանեց մյուսին։ Ի պատասխան դրան նրա ընկերը կրակ բացեց և սպանեց հարձակվողին և մեկ այլ մարդու։ Պատճառը չգիտենք։ Նորմալ նստած էին։ Ոչ մի աղմուկ չկար», — ասել է Չեբոտարյովը։
Կրակելուց հետո Մուխտար Մալսյուգենովը փախել է դեպքի վայրից։ Այժմ որոնում են նրան։
