ԵՐԵՎԱՆ, 27 նոյեմբերի — Sputnik. Եվրասիական միությունը չի ստեղծել սպասվող միասնական տնտեսական տարածքը, խորհրդարանում հայտնել է «Ելք» խմբակցության պատգամավոր Էդմոն Մարուքյանը, ԵԱՏՄ-ում Հայաստանի անդամակցության մասին լսումների ժամանակ։
Լսումները կազմակերպել էր «Ելք» խմբակցությունը, որը հանդես է գալիս ԵԱՏՄ-ից Հայաստանի դուրս գալու և ԵՄ-ի հետ ասոցացման համաձայնագիր կնքելու օգտին։
Մարուքյանը նշեց, որ Հայաստանի որոշ գործընկեր-երկրների ներկայացուցիչներ Եվրասիական միության շրջանակներում պարբերաբար բացարձակ ոչ բարեկամական հայտարարություններ են անում արցախյան հարցի վերաբերյալ։
ՀՀԿ իշխող կուսակցության պատգամավոր Արմեն Աշոտյանն իր հերթին ասաց, որ, իհարկե, Արցախի հարցի վերաբերյալ հայտարարությունները Հայաստանի օգտին չեն, սակայն Ռուսաստանն այստեղ զսպվածություն է ցուցաբերում։ Նա զսպվածություն է ցուցաբերում նաև ԵԱՀԿ ՄԽ կազմում հակամարտության կարգավորման հարցում։ Հերթական անգամ այդ զսպվածությունն արտահայտվեց Բաքու և Երևան Լավրովի վերջին այցերի ժամանակ։
Միևնույն ժամանակ Աշոտյանը հիշեցրեց, որ ԵԱՏՄ-ն տնտեսական միություն է, սակայն մեր ընդդիմախոսների փաստարկները ռազմաքաղաքական են։
«Եթե գործընկերներն առաջարկեին դուրս գալ ՀԱՊԿ-ից, ես գոնե կհասկանայի քննարկման ընթացքը։ Սակայն պահանջել դուրս գալ տնտեսական միությունից, այդքան էլ ճիշտ չէ», — նշեց Աշոտյանը։
Եթե խոսենք զուտ տնտեսական գործոնների մասին, ապա Հայաստանում ՀՆԱ-ն դոլարային արտահայտմամբ իսկապես ընկել է։ Սակայն ավելի շատ այն ընկել է այն երկրներում, որոնք ԵՄ-ի հետ ասոցացման համաձայնագիր են ստորագրել։
2008-16 թվականներին Հայաստանի ՀՆԱ-ն դոլարային արտահայտմամբ կրճատվել է 11,9 մինչև 10,7 մլրդ, այսինքն` ավելի քան 10%։ Իսկ ահա Վրաստանում ՀՆԱ-ի անկումը կազմել է 14%, Մոլդովայում` 16%, Ուկրաինայում` 22%։
Եթե հաշվի չառնենք արժույթի տատանումները, 2017 թվականի 10 ամիսների ընթացքում տնտեսական ակտիվությունը հանրապետությունում աճել է 7%-ով։ Տարվա արդյունքներով ՀՆԱ-ի 4,3% աճ է սպասվում, 2018 թվականին` 4,5%։
