ԵՐԵՎԱՆ, 25 նոյեմբերի — Sputnik, Լիլիթ Հարությունյան․ Fashion Aids Line խորագրով դիզայներների միջազգային մրցույթը կանցկացվի Երևանում։ Մրցույթի ընթացքում կպարզվի, թե ով է կարողանում ավելի ինքնատիպ մեկնաբանել «կարմիր ժապավենը», որն ամբողջ աշխարհում միավորում է ՄԻԱՎ-ի դեմ պայքարողներին։ Այս մասին Sputnik Արմենիայի թղթակցին հայտնեց Հայաստանում Fashion Aids Line մրցույթի կազմակերպիչ Նաիրա Նիազյանը։
Նրա խոսքով,՝ դեկտեմբերի 8-ին կայանալիք «Նորաձևության հայկական օր 2017» ծրագրի շրջանակում անցկացվող միջոցառման նպատակը հասարակության իրազեկությունը բարձրացնելն է։
«Մրցույթը մի քանի նպատակ ունի` նորաձևության միջոցով հայ հասարակության ուշադրությունը հրավիրել ՄԻԱՎ/ՁԻԱՀ-ի խնդրին ու թույլ չտալ ՄԻԱՎ-ով ապրող մարդկանց հանդեպ որևէ խտրականություն, կոտրել կարծրատիպերը, որոնք խանգարում են մարդկանց ՄԻԱՎ-ի ստուգումներ անցնել», — ասաց Նիազյանը։
Նա նշեց, որ մրցույթի մասնակիցները պետք է ներկայացնեն հավաքածու (առնվազն երեք աշխատանք), որի մեջ այս կամ այն կերպ ներկայացված կլինի «կարմիր ժապավենը»։ Բացի այդ, կներկայացվեն տարբեր դիմակներ, որոնք խորհրդանշում են խտրականության տարբեր տեսակները։
«Միջոցառումը կմեկնարկի հայտնի դիզայներների հավաքածուների ցուցադրմամբ, մասնավորապես, իրենց աշխատանքները կցուցադրեն իտալական, բելառուսական, ռուսական մոդելավորողները, որոնք ներկայացված են Մոսկվայի ZIAN առևտրացուցադրական պատկերասրահում։ Բացի այդ միջոցառմանը կմասնակցեն հայկական շոու-բիզնեսի աստղերը, որոնք ցանկանում են հասարակության ուշադրությունը հրավիրել ՄԻԱՎ/ՁԻԱՀ խնդրին», — հավելեց Նիազյանը։
Նա ընդգծեց, որ մրցույթի հաղթողները կկարողանան Հայաստանը ներկայացնել նորաձևության շոուում, որը կկայանա Արևելյան Եվրոպայի և Կենտրոնական Ասիայի VI Միջազգային գիտաժողովի շրջանակում (միջոցառումը տեղի կունենա 2018 թվականի ապրիլի 18-ից 20-ը Մոսկվայում)։
Fashion Aids Line մրցույթի կազմակերպիչներն են ՄԱԿ-ի ՄԻԱՎ/ՁԻԱՀ-ի հարցերի համատեղ ծրագիրը (ՄԱՁԻԱՀ) ու Yerevan Fashion Week «Golden Lace» նորաձևության շոուն։
