ԵՐԵՎԱՆ, 25 նոյեմբերի — Sputnik. Հայ շախմատիստ Մանուել Պետրոսյանը մինչև 20 տարեկան շախմատիստների աշխարհի առաջնության վերջին տուրում հաղթանակ տոնեց ու միայն լրացուցիչ գործակիցներով առաջին տեղը զիջեց նորվեգացի Տարի Արյանին:
Նախավերջին տուրում իրավիճակն աղյուսակում խճճված էր, ու մի քանի շախմատիստներ մրցանակային տեղերում հայտնվելու հավասար հնարավորություններ ունեին: Հայ երիտասարդ շախմատիստ գեղեցիկ ոճով հաղթանակի հասավ մրցակցի նկատմամբ և ապահովեց արծաթե մեդալը:
Վերջին երկու տուրերից առաջ Մանուել Պետրոսյանը աղյուսակում ընթանում էր յոթերորդ տեղում` առաջատարին զիջելով մեկ միավորով: Հայ շախմատիստը հիանալի խաղ դրսևորեց մրցաշարի վերջում: Երկու անընդմեջ հաղթանակները, նախ` չինացի Ժինշի Բաիի, ապա ռուս Կիրիլ Ալեքսեենկոյի նկատմամբ, Մանուել Պետրոսյանին ոսկե մեդալի համար պայքարելու հնարավորություն տվեցին:
Երեք շախմատիստ՝ Տարի Արյանը, Մանուել Պետրոսյանը և հնդիկ Արավիդ Չիտհամբարանը 11 հնարավորից վաստակեցին 8,5 միավոր: Հայ շախմատիստը լրացուցիչ գործակիցներով զիջեց նորվեգացուն, բայց գերազանցեց հնդիկ շախմատիստին ու դարձավ աշխարհի փոխչեմպիոն:
Նշենք, որ սա այսօր Հայաստանի շախմատային երկրորդ հաղթանակն էր. գրոսմայստեր Լևոն Արոնյանն էլ ՖԻԴԵ-ի Գրան պրիի հաղթող ճանաչվեց։
