ԵՐԵՎԱՆ, 25 նոյեմբերի — Sputnik. ԵԱՀԿ Խորհրդարանական վեհաժողովի նախագահ Գեորգի Ծերեթելին իր առաջին ելույթում կոչ է արել ավելացնել ԼՂ հակամարտության կարգավորմանն ուղղված ջանքերը` իր կողմից խոստանալով աջակցել դրանց լուծմանը։ Այս մասին հայտնում է ԵԱՀԿ ԽՎ պաշտոնական կայքը։
Ծերեթելին կարևորել է հակամարտությունների կարգավորմանն ուղղված ջանքերը։
«Եթե խոսենք Ուկրաինայի, ԼՂ-ի կամ Վրաստանի հակամարտությունների և տարածքների օկուպացման մասին, դրանք բոլորն ամեն օր ողբերգական հետևանքներ են ունենում։ Սա պետք է շարունակի լինել մեր ուշադրության կենտրոնում»,- ասել է Ծերեթելին։
Նա` որպես ԵԱՀԿ ԽՎ նախագահ, խոստացել է որ ԵԱՀԿ-ն լիովին պատրաստ է աջակցել այդ խնդիրների լուծմանը։
«ԵԱՀԿ ԽՎ նախագահի պաշտոնում իմ առաջնահերթություններից է երաշխավորել, որ ԵԱՀԿ-ն լիովին պատրաստ է այդ խնդիրների լուծմանը, Հելսինկիի եզրափակիչ ակտի հիմնարար սկզբունքների աջակցմանը, ընդհանուր արժեքների խրախուսմանը և հակամարտությունների կարգավորման գործում վեհաժողովի ներդրմանը»,- ասել է ԵԱՀԿ ԽՎ նորանշանակ նախագահը։
