ԵՐԵՎԱՆ, 24 նոյեմբերի — Sputnik. Հայաստան-ԵՄ համաձայնագիրն աջակցում է ղարաբաղյան հակամարտության լուծմանը` միջազգային իրավունքի նորմերին համապատասխան։ Այդ մասին հայտարարել է ԵՄ արտաքին քաղաքականության և անվտանգության հարցերով գերագույն հանձնակատար Ֆեդերիկա Մոգերինին` Հայաստանի արտգործնախարար Էդվարդ Նալբանդյանի հետ համագործակցության մասին համաձայնագիրը ստորագրելու ժամանակ։
ՀՀ-ԵՄ համապարփակ և ընդլայնված գործընկերության մասին համաձայնագիրը ստորագրվել է Բրյուսելում այսօր Արևելյան գործընկերության գագաթնաժողովի շրջանակում։
Մոգերինին նշել է միջնորդների` ԵԱՀԿ ՄԽ-ի աշխատանքի կարևորությունը բանակցություններում։
«Առաջին անգամ է նման համաձայնագիր ստորագրվում Եվրասիական միության անդամ-երկրի հետ», — ընդգծել է Մոգերինին։ Ըստ նրա` այժմ կարևոր է, որ համաձայնագիրն ուժի մեջ մտնի։
Ինչպես նշել է ՀՀ արտգործնախարար Էդվարդ Նալբանդյանը, ՀՀ-ի և Եվրամիության միջև Համապարփակ և ընդլայնված գործընկերության համաձայնագրի ստորագրումը նոր էջ է բացում Հայաստանի Հանրապետության և Եվրամիության միջև երկկողմ հարաբերությունների պատմության մեջ: Համաձայնագրով օրինական հիմքեր են հաստատվում քաղաքական երկխոսություն, տնտեսական համագործակցություն համար, ինչպես նաև նոր հնարավորություններ է բացում ներդրումների և մեր քաղաքացիների բարեկեցությունն ապահովելու համար:
Համաձայնագիրը նաև զգալի խթան է հանդիսանալու Հայաստանում իրականացվող բարեփոխումների համար, ավելացրել է նա։
«Համաձայնագիրը վերահաստատում է նաև ԵՄ աջակցությունը Մինսկի խմբի՝ Լեռնային Ղարաբաղի հակամարտության խաղաղ կարգավորմանն ուղղված ջանքերին՝ միջազգային օրենքի համապատասխան, այդ թվում բռնություն չկիրառելու, մարդու իրավունքները հարգելու և ժողովուրդների ինքնորոշման իրավունքը», — հայտարարել է նա:
Ավելի վաղ, ելույթ ունենալով Բրյուսելում «Արևելյան գործընկերություն» գագաթնաժողովին, ՀՀ նախագահ Սերժ Սարգսյանն ասել էր, որ 2017 թվականն իրավամբ կարելի է համարել Հայաստան-ԵՄ հարաբերությունների քառորդդարյա պատմության կարևոր հանգրվաններից մեկը, որ նշանավորվում ՀՀ-ԵՄ Համապարփակ և ընդլայնված գործընկերության համաձայնագրի ստորագրմամբ։ Նախագահի խոսքով, այն համընդգրկուն փաստաթուղթ է, արտացոլում է երկկողմ փոխգործակցության վերջին շրջանի նշանակալի զարգացումները և սահմանում դրանց խորացման համար անհրաժեշտ ուղենիշները։
ՀՀ նախագահը հայտարարել է, որ ՀՀ-ԵՄ Համապարփակ և ընդլայնված գործընկերության համաձայնագիրը բոլորի համատեղ հաջողությունն է և կարող է դրական նախադեպ դառնալ համագործակցային այլ ծրագրերի համար:
Sputnik Արմենիան վերլուծել է ՀՀ-ԵՄ համաձայնագրի բնօրինակը (357 էջ անգլերեն տեքստի) և ներկայացրել փաստաթղթի հիմնական դրույթները։ Նոր պայմանագրի և ԵՄ-ի հետ ասոցացման մասին համաձայնագրի միջև սկզբունքային տարբերությունների մասին հոդվածի հետ կարելի է ծանոթանալ` անցնելով հետևյալ հղումով։
