ԵՐԵՎԱՆ, 24 նոյեմբերի — Sputnik. Երևանյան սուպերմարկետներում ձվի դեֆիցիտ գոյություն չունի, այն բավական քանակով առկա է վաճառքում և վաճառվում է նույն ծավալով, ինչ մինչ թանկացումը։ Sputnik Արմենիայի հետ զրույցում, մեկնաբանելով ձվի շուկայում վերջին օրերին գրանցված թանկացումը, ասաց Տնտեսական մրցակցության պաշտպանության պետական հանձնաժողովի մամուլի քարտուղար Գայանե Սահակյանը։
«Ձուն դասվում է այն ապրանքների շարքը, որոնց գնագոյացումը էապես պայմանավորված է սեզոնայնությամբ: Տարվա այս ժամանակահատվածում, մի շարք հանգամանքներով, այդ թվում նաև պահանջարկի էական ավելացմամբ պայմանավորված՝ նկատվում են գնային որոշակի տատանումներ»,- ասաց Սահակյանը` հավելելով, որ հանձնաժողովի դիտարկման արդյունքներով, այս պահին ձվի մանրածախ գինը շուկայում 65-70 դրամի սահմաններում է:
Ի դեպ, տարվա այս ժամանակահատվածում ներքին պահանջարկը բավարարելու համար տնտեսվարողները որպես կանոն ձվի որոշակի խմբաքանակների ներկրումներ են իրականացնում։
Գայանե Սահակյանը չի բացառում, որ դրանց արդյունքում առաջիկայում նաև գնի կարգավորումներ տեղի կունենան։
Ըստ հայկական ԶԼՄ-ների` Երևանի սուպերմարկետներում ձվի վաճառքի բաժիններում վերջին օրերին ակտիվ շարժ է նկատվում. խանութների աշխատակիցներն օրվա մի զգալի մասն անցկացնում են ձվի նոր խմբաքանակները տաղավարներում տեսակավորելու վրա: Հրապարակումների համաձայն` բացի շարժից, նաև ձվի գինն է բարձրացել` հասնելով 70-ից 90 դրամի:
