ԵՐԵՎԱՆ, 24 նոյեմբերի — Sputnik. ԵՄ-ն անհրաժեշտ ժամկետում կսկսի Հայաստանի հետ բանակցել վիզայի ռեժիմի չեղարկման շուրջ։ Ինչպես հայտնում է ՌԻԱ Նովոստին, այս մասին գրված է Բրյուսելում կայացած Արևելյան գործընկերության գագաթնաժողովի մասնակիցների ամփոփիչ հայտարարության մեջ։
Նման բանակցություններ հնարավոր կլինի սկսել, եթե ռեադմիսիայի (անօրինական միգրանտների վերադարձ — խմբ.) մասին համաձայնագիրն արդյունավետ գործի։
Ինչպես նշվում է հայտարարության մեջ, անհրաժեշտ է «ժամանակին սկսել Հայաստանի հետ վիզայի ազատականացման մասին երկխոսությունը, եթե պայմաններ ստեղծվեն լավ կառավարվող և անվտանգ տեղաշարժի, այդ թվում վիզայի ռեժիմի պարզեցման և կողմերի միջև ռեադմիսիայի մասին համաձայնագրի կատարման համար»։
2013 թվականին Հայաստանը ԵՄ երկրների համար հանել է մուտքի արտոնագրի պահանջը, իսկ 2014 թվականի հունվարից ազատականացվել է ԵՄ-ի հետ կարճաժամկետ վիզաների տրամադրումը ՀՀ քաղաքացիներին։
ԵՄ Արևելյան գործընկերությունը վեց երկիր է միավորում` Բելառուս, Ուկրաինա, Մոլդովա, Վրաստան, Հայաստան և Ադրբեջան։ Հայաստանի պատվիրակությունը Բրյուսելի գագաթնաժողովում գլխավորում է ՀՀ նախագահ Սերժ Սարգսյանը։ Այստեղ սպասվում է ՀՀ-ԵՄ համապարփակ և ընդլայնված գործընկերության մասին համաձայնագրի ստորագրումը։
