Երեկ` նոյեմբերի 22-ին, Թբիլիսիի Գաբրիել Սալոսկով վանականի փողոցում Վրաստանի պետական անվտանգության հակաահաբեկչական բաժինը հատուկ գործողություն էր իրականացնում։
Կասկածյալները թաքնվում էին բազմաբնակարան շենքում։
Շենքին կից տարածքը շրջապատվել էր։ Ոստիկանական ժապավենից այն կողմ տեղակայվել էին պարեկային ոստիկանության մեքենաները։
Մոտակայքում ապրողներն ասել էին, որ իրենց չեն թողնում դուրս գալ բնակարաններից։
Հատուկ գործողության արդյունքում Թբիլիսիում ձերբակալվել է հանցավոր խմբի մեկ անդամ, երեքը սպանվել են: Հակաահաբեկչական գործողությունը սկսվել է նոյեմբերի 21-ի երեկոյան և տևել ավելի քան 20 ժամ: Այս ամբողջ ընթացքում անընդհատ հրաձգություն է ընթացել, պայթյուններ են հնչել: Հատուկ գործողության ընթացքում զոհվել է Պետական անվտանգության ծառայության մեկ անդամ:
