ԵՐԵՎԱՆ, 23 նոյեմբերի — Sputnik. Թալար Նինան (Թալար Բիլեմջյան) հաճախ է գալիս Հայաստան, որովհետև հենց այս երկրում է նա կարողանում ոգեշնչվել։ Այս մասին երիտասարդ դիզայները պատմել է khaleejtimes.com-ին։
Թալարի խոսքով, Հայաստանը ուժ է տալիս և օգնում նորովի նայել ճարտարապետությանը, արվեստին ու ասեղնագործությանը։
«Դիզայները նաև բարեգործ է։ Նա Moving Forward կենտրոնի միջոցների մի մասն ուղղում է գյումրեցի երեխաներին»,- գրում է պարբերականը։
Թալարը պատմել է, որ Հայաստանից բացի, ընտանիքի հետ ճանապարհորդում է արաբական երկրներով, որպեսզի լայն պատկերացում կազմի Արևելքի մշակույթի ու պատմության մասին։ Նա արդեն հասցրել է լինել Բեյրութում, Հալեպում, Դամասկոսում։
Երիտասարդ հայուհու ապրանքանիշը ստեղծվել է 2016 թվականին, առաջիկայում նա կթողարկի իր երրորդ հավաքածուն, որը կկոչվի «Արևելյան խոստում»։
Թալար Նինան ծնվել է Լոս Անջելեսում, ավելի ուշ նրա ընտանիքը տեղափոխվել է Լոնդոն, որտեղ Թալարը դիզայներական կրթություն է ստացել։ Այնուհետև տեղափոխվել է ԱՄԷ, որտեղ էլ սկսել է դիզայների կարիերան։
