ԵՐԵՎԱՆ, 23 նոյեմբերի — Sputnik, Նելլի Դանիելյան. Հայաստանում սկսված աշնանային թանկացումներն իրենց տրամաբանական շարունակությունն ունեցան սեզոնային թանկացումների շղթայով։ Վերջին օրերին թանկացման ալիքը հասավ հավկիթներին։ Դրանց գինը վաճառակետերում հասել է 90 դրամի։
Տնտեսագետ Ատոմ Մարգարյանը, վերլուծելով հայաստանյան շուկան ցնցող գնաճը, Sputnik Արմենիայի հետ զրույցում նշում է, որ թեև պատկան պետական կառույցները վստահեցնում են, որ իրավիճակը վերահսկելի է և խնդիրներ չեն լինի, բայց դա այնքան էլ չի համապատասխանում իրականությանը։
«Գնաճային ֆոնը 10 ամսվա տվյալներով ցածր է, պաշտոնական վիճակագրության համաձայն, այն չի գերազանցում 1.2 տոկոսը»,– նշում է Մարգարյանը` միաժամանակ մտավախություն հայտնելով, որ նոյեմբեր–դեկտեմբերին գնաճի նման տեմպերի շարունակվելու դեպքում այն կարող է հատել տարվա համար կանխատեսված 3.5-4 տոկոսի սահմանագիծը։
Տնտեսագետը փաստում է, որ անցնող մի քանի ամսում կարագն ու մսամթերքը Հայաստանում շուրջ 50 տոկոսով թանկացել են, ինչը պայմանավորված է նաև ներկրվող ապրանքների թանկացմամբ։
Փոխարենը Հայաստանում արտադրվող ապրանքների թանկացումը Ատոմ Մարգարյանի խոսքով, Հայաստանից արտահանումների վրա բացասաբար չի ազդի։ «Եթե համեմատենք ԵԱՏՄ երկրների հետ, այսօր մեր երկրում գներն ավելի ցածր են, ինչը մրցակցային առավելություն է տալիս` արտահանման տեսակետից»,– ասում է Մարգարյանը։
Եվ, այդուհանդերձ, հիմնական թանկացումները դեռ առջևում են, մինչև Նոր տարի դեռ մեկ ամսից ավելի ժամանակ կա։
