ԵՐԵՎԱՆ, 23 նոյեմբերի — Sputnik, Արամ Գարեգինյան. Գյուղացիները, արտահանողները, գինու ու կոնյակի գործարանները` բոլորը միասնական տվյալների բազայում կհայտնվեն` արբանյակից ու երկրից։ Հայաստանի խաղողագործների և գինեգործների հիմնադրամի նպատակն է իմանալ ամեն ինչ յուրաքանչյուր ողկույզի մասին։
Ու դա անիմաստ և առավել ևս տարօրինակ չէ։ Եթե հասկանանք` ինչքան խաղող ունենք, ապա կարելի է իմանալ` ինչքան գինի ու կոնյակ կունենանք։ Այդ դեպքում կարելի է հեշտորեն կանխել կոնյակի փոխարեն ներկած ջուր վաճառելու ու նման «հայտնագործություններ» անելու փորձերը։
Դրա համար պարտադիր ուզում են հավաքել բոլոր նրանց, ովքեր այս կամ այն կերպ գործ ունեն խաղողի հետ` աճեցնում են, վաճառում են (Հայաստանում կամ արտասահմանում), կամ վերամշակում են, Sputnik Արմենիայի թղթակցի հետ զրույցում ասաց հիմնադրամի տնօրեն Ֆրունզիկ Հարությունյանը։
«Տաք հողի մեջ խաղողի կորիզը կթաղեմ»… Իսկ ի՞նչ հողի
Խաղողի աճելու վայրի մասին հստակ տվյալները հնարավորություն կտան գինու աշխարհագրական անվանումների համակարգ ներդնել (հնարավոր է, նաև` սեղանի խաղողի)։ Ընդ որում, այնպիսի համակարգ, որն արտասահմանում էլ վստահություն վայելի։ Այդ ժամանակ կարելի է արտահանել Ռուսաստան ու Եվրոպա ոչ թե սովորական «հայկական գինի», այլ «Արենի» կամ «Ոսկեվազ»։
Իհարկե, համաշխարհային աշխարհագրական ապրանքանիշներին հասնելու համար դեռ շատ բան է պետք անել։ Բայց եվրոպական շուկայում չգրված օրենք կա` տեղական կոլորիտով գինին հավելագին է ստանում։ Նույնիսկ, եթե դա «Սենթ Էմիլյոն» կամ «Կիանտի» չէ, այլ անհայտ (ու անարտասանելի) «Եղեգնաձոր»։ Աշխարհագրական նշումով գինու համար պատրաստ են ավելի շատ վճարել։
Խաղողի այգին` երկնքից ու երկրից
«Խաղողի այգիների տեղն ու չափերը սահմանելու համար դրանք նկարահանելու ենք արբանյակից ու անօդաչու թռչող սարքերից։ Հետո յուրաքանչյուր խաղողի այգի այցելելու ու անձնագիր ենք կազմելու` տեսակների ու բերքի մասին տեղեկություններով», – հավելեց Հարությունյանը։
2018 թվականին համակարգն ուզում են փորձարկել երկրի գինեգործական շրջաններից մեկում, իսկ երկու-երեք տարուց տարածել այն ամբողջ հանրապետությունում։
