ԵՐԵՎԱՆ, 22 նոյեմբերի – Sputnik, Խաչիկ Չախոյան. Ֆուտբոլի Հայաստանի ազգային հավաքականի նախկին դարպասապահ Ռոման Բերեզովսկին չի հեռացել ֆուտբոլից, այսօր մարզչական գործունությամբ է զբաղվում Մոսկվայի «Դինամոյի» կազմում, բայց շարունակում է հետևել հայկական ֆուտբոլին:
«Միշտ եմ հետաքրքրվում հայկական ֆուտբոլով և բարձրագույն խմբի խաղերով, դե ազգային հավաքականն էլ առանձնահատուկ տեղ ունի ինձ համար: Եվ ես համոզված եմ, որ մինչև կյանքիս վերջ պետք է հետաքրքրվեմ հայկական ֆուտբոլով»,- Sputnik Արմենիային ասաց Բերեզովսկին:
Նա անդրադարձավ Աշխարհի 2018 թվականի ընտրական մրցաշարում մեր հավաքականի անհաջող ելույթներին։
«Շատ ցավալի պարտություն էր լեհերին 1:6 հաշվով զիջելը: Հասկանում եմ, որ Լեհաստանի ընտրանին շատ ուժեղ թիմ է, բայց մերոնք նման հաշվով չպետք է պարտվեին: Կարծում եմ`խնդիրը պաշտպանության մեջ է: Շատերը շտապում են մեղադրել դարպասապահներին, բայց ֆուտբոլում և՛ հարձակվում, և՛ պաշտպանվում է թիմը: Կարծում եմ` պաշտպանական գծի ու դարպասապահների սխալները հանգեցրին նման արդյունքի»,- ասաց նա:
Նա հիշեցրեց, որ Հայաստանի հավաքականի դարպասապահներ Արսեն Բեգլարյանն ու Գրիգոր Մելիքսեթյանն իրենց մեկնարկային խաղերը բավականին բարձր մակարդակով են անցկացրել։
«Նրանք պետք է հիշեն, թե ինչի շնորհիվ կարողացան լավ խաղեր անցկացնել հավաքականի կազմում ու յուրաքանչյուր խաղին մոտենան նույն ձևով: Փորձի պակաս կա, բայց հենց իրենք պետք է կարողանան վերլուծել իրենց խաղը: Շատ կարևոր է նաև պաշտպանների հետ համագործակցությունը»,- ասաց Բերեզովսկին:
Որոշ ժամանակ առաջ խոսակցություններ պտտվեցին, որ Բերեզովսկին կարող է վերադառնալ Հայաստան: Ազգային հավաքականի նախկին դարպասապահը չբացառեց այդ հնարավորությունը։
«Երբ ես մարզում էի «Դինամո»-2-ը, նույնիսկ հրավերի դեպքում դժվար թե հնարավոր լիներ Հայաստան տեղափոխվել: Հիմա քանի որ երիտասարդական թիմում եմ, եթե Հայաստանից հրավեր լինի, ապա մեծ սիրով կընդունեմ»,- ասաց նա:
Բերեզովսկին նշեց, որ մինչև այսօր էլ կապ է պահում Հայաստանի խաղընկերների հետ և միշտ մեծ պատիվ է համարել ազգային հավաքականի դարպասը պաշտպանելը։
«Ես ինձ միշտ էլ հայ եմ զգացել Հայաստանում և, ծնվելով ու մեծանալով Երևանում, ոչ մի խնդիր երբեք չեմ ունեցել իմ ազգանվան հետ: Ես իմ ճակատագրից շնորհակալ եմ: Իսկ ազգային հավաքականի դարպասն ու պատիվը պաշտպանելը միշտ էլ մեծ պատիվ եմ համարել ու համարում: Շատ կուզենայի, որ Հայաստանի հավաքականը մեծ հաջողությունների հասնի: Դա կլինի նաև իմ հաջողությունը»,- ընդգծեց նա:
Բերեզովսկին նշեց, որ Հայաստանի հավաքականն արդեն կայացած կորիզ ունի, և ֆուտբոլիստները հիմա արդեն շատ լավ հասկանում են, թե ինչ պահանջներ են դնում մարզիչները։
Նշենք, որ Ռոման Բերեզովսկին Հայաստանի ազգային հավաքականի կազմում վերջին պաշտոնական հանդիպումն անցկացրեց 2015 թվականի հունիսի 15-ին (Հայաստան-Պորտուգալիա 2:3), իսկ հրաժեշտի հանդիպումն անցկացրեց 2016 թվականի մարտի 25-ին ու իր տեղը դարպասում զիջեց Արսեն Բեգլարյանին: Սկսած 2015 թվականի հուլիսից` նա Մոսկվայի «Դինամոյում» անցավ աշխատանքի արդեն որպես դարպասապահների մարզիչ:
