ԵՐԵՎԱՆ, 21 նոյեմբերի — Sputnik. Պլովդիվում քրեական վիճաբանության ընթացքում հային դանակով մեջքից հարվածել են, փոխանցում է բուլղարական «Բլից» պարբերականը։
Ականատեսների խոսքով` քաղաքի արվարձաններից մեկում` «Ռուսական շուկայի» մոտ, հայերի երկու խմբավորում է կռվել։ Հետո վիրավոր ընկերոջը թողել` գնացել են։
Չնայած դրան, երբ տուժածին հիվանդանոց են հասցրել, Հովհաննիսյան ազգանունով տղամարդը չի ասել ոչ ընկերների, ոչ թշնամիների անունները։
Նշենք, որ Բուլղարիայում քրեական նորությունների ժամանակ պարբերաբար հայկական ազգանուններ են հնչում։ Դրա համար քրեական աշխարհի մասին գրող բուլղարացիները լավ ուսումնասիրել են հայկական «ճշտերը»։ Գործի իմացությամբ՝ թերթը շարունակում է.
«Հայերի մոտ այդպես ընդունված չէ։ Նրանց «ավանդույթների» համաձայն` այդպիսի խնդիրները պետք է իրենց շրջանում լուծվեն, առանց որևէ իրավական մարմինների միջամտության»։
Պարբերականը գրում է, որ մոտ մի տարի առաջ հայերը կրակոցներ են արձակել Պլովդիվի կենտրոնում, նրանցից մեկը հիվանդանոց է ընկել ձեռքի վնասվածքով ու նույնպես հրաժարվել է որևէ մեկի անունը տալ։
