ԵՐԵՎԱՆ, 20 նոյեմբերի – Sputnik. Վերջին շրջանում հասարակության որոշ խմբերում քննարկվում են ՀՀ ԿԱ պետական եկամուտների կոմիտեի կողմից կիրառվող «Եկամտային հարկի մասին» ՀՀ օրենքի համաձայն հիփոթեքային վարկի սպասարկման համար վճարվող տոկոսների գումարների չափով եկամտային հարկի վերադարձի հետ կապված գործընթացները:
ՀՀ կառավարությանն առընթեր Պետեկամուտների կոմիտեի տեղեկատվության և հասարակայնության հետ կապերի բաժինը հայտարարում է, որ դրանք մտացածին լուրեր են:
«Տարածվող երկիմաստ մոտեցումները և տարաբնույթ մեկնաբանությունները բացառելու նպատակով հայտնում ենք` կառուցվող բնակարանի գնման իրավունքի կամ նախնական առուվաճառքի պայմանագրերի (այդ թվում՝ պետական ծառայողների մատչելի բնակարաններով ապահովման ծրագրի շրջանակներում) առկայության դեպքում քաղաքացիները օգտվել են ու շարունակելու են օգտվել «Եկամտային հարկի մասին» ՀՀ օրենքի 8.2-րդ հոդվածով սահմանված իրավունքից»,- հայտնում են ՊԵԿ-ից:
Նշենք, որ տվյալ հոդվածով նախատեսվում է վճարված եկամտային հարկի գումարներից բնակարան ձեռք բերելու կամ անհատական բնակելի տուն կառուցելու նպատակով վարձու աշխատողի, անհատ ձեռնարկատիրոջ և նոտարի կողմից ստացված հիպոթեքային վարկի սպասարկման համար վճարվող տոկոսների գումարների վերադարձը։
