ԵՐԵՎԱՆ, 18 նոյեմբերի — Sputnik. Տղամարդ ներխուժել է Կոտայքի մարզի Բյուրեղավանի երեխաների խնամքի և պաշտպանության գիշերօթիկ հաստատություն և սկսել է աշխատակիցների և երեխաների ներկայությամբ հայհոյանքներ ու անբարո խոսքեր ուղղել տնօրեն Մարինե Գալստյանի հասցեին, հաղորդում է shamshyan.com-ը:
Դեպքը տեղի է ունեցել նոյեմբերի 16-ին։ Կատավածի մասին նոյեմբերի 17-ին դիմում է ներկայացրել տնօրեն Մարինե Գալստյանը, որը հայտնել է, որ անծանոթ տղամարդը հնչեցրել է նաև սպառնալիքներ և հարվածել է գիշերօթիկի սան՝ 8-ամյա մի տղայի:
Ոստիկանությունը պարզել է, որ գիշերօթիկ ներխուժած անձը Հայկ Ստեփանյանն է, որի աղջիկը սովորում է նշված հաստատությունում, և այնտեղ երեխաների միջև վիճաբանություն է տեղի ունեցել: Աղջիկը այդ մասին հայտնել է ծնողին, որից հետո ծնողը եկել է դպրոց ու, ըստ տնօրենի և աշխատակիցների հայտարարությունների՝ անվայելուչ պահել իրեն:
Փաստի առթիվ Ոստիկանության Կոտայքի բաժնի հետաքննչական բաժանմունքում տնօրենի դիմումի փաստով հետաքննություն է սկսվել:
