ԵՐԵՎԱՆ, 18 նոյեմբերի — Sputnik. Դու ամեն ինչում ամենագեղեցիկն ես, Instagram-ի իր էջում տեղադրված հարսանեկան արարողության ժամանակ արված ընտանեկան լուսանկարի տակ գրել է Ալեքսիս Օհանյանը:
Թենիսիստուհի Սերենա Ուիլյամսի և գործարար Ալեքսիս Օհանյանի հարսանեկան արարողությանը սպասում էին աշխարհի բոլոր պարբերականները: Sputnik Արմենիան իր ընթերցողներին է ներկայացնում նորապսակների հարսանեկան արարողության ժամանակ արված ամենագեղեցիկ լուսանկարների ընտրանին:
Ինչ զգեստով է ներկայանալու հարսնացուն, ինչ է նվիրելու փեսան և ով է գալու արարողությանը. բոլոր այս հարցերի պատասխանները շատ դժվար էր ստանալ, չէ՞ որ աստղային զույգը գիտակցաբար փակ երեկույթ էր կազմակերպել` հրավիրելով հյուրերի նվազագույն քանակ: Զույգի միայն ամենամտերիմ ընկերներն ու բարեկամներն էին ժամանել Նոր Օրլեան, որտեղ նոյեմբերի 16-ին ժամանակակից արվեստի նորաձև կենտրոնում տեղի ունեցավ Սերենայի և Ալեքսիսի հարսանեկան արարողությունը:
Արարողությանը ներկա էին Ամերիկայի «ամենագլամուրային» հայտնիները` Քիմ Քարդաշյանը, Սերենայի ավագ քույր՝ Վեներա Ուիլյամսը, երգչուհի Բեյոնսեն, դերասանուհի Եվա Լոնգորիան, ինչպես նաև շոու բիզնեսի և սպորտի աշխարհի մի շարք այլ ոչ պակաս հայտնի ներկայացուցիչներ:
Ավելի վաղ լրատվամիջոցները գրել էին, որ աստղային զույգն իր մեկ միլիոն դոլարանոց հարսանիքի տեղն ու ժամանակը գաղտնի է պահելու:
Հիշեցնենք, որ Օհանյանն ու Ուիլյամսը հայտնել էին ամուսնանալու մտադրության մասին 2016 թվականի դեկտեմբերին` նշանադրության ժամանակ։ Նրանք նշել էին, որ մտադիր են հարսանիք կազմակերպել երեխայի ծնվելուց անմիջապես հետո։
«Մեծ սաղավարտի» մրցումների 23-ակի հաղթող Սերենա Ուիլյամսը և ամերիկահայ գործարար, Reddit-ի համահիմնադիր Ալեքսիս Օհանյանը ծնող են դարձել 2017 թվականի սեպտեմբերի 1-ին։ Ծնվել էր նրանց գեղեցկուհի դուստրը` Օլիմպիան, որը կշռում էր 3090 գրամ։
