ԵՐԵՎԱՆ, 17 նոյեմբերի — Sputnik. Բրազիլիան արցախյան հարցի խաղաղ լուծման կողմնակից է, ասաց Բրազիլիայի արտգործնախարար Ալոիզիու Նունես Ֆերեյրան իր հայ գործընկեր Էդվարդ Նալբանդյանի հետ համատեղ մամուլի ասուլիսի ժամանակ։
«Լեռնային Ղարաբաղի հարցով մենք մեր դիրքորոշումն ունենք։ Բրազիլիան խաղաղ երկիր է, մենք հակամարտությունների խաղաղ` միջազգային իրավունքի վրա հիմնված կարգավորման կողմնակիցներ ենք», — ասաց Ֆերեյրան։
Նրա խոսքով`արցախյան հարցը պետք է լուծվի ԵԱՀԿ Մինսկի խմբի շրջանակում, իսկ մինչ վերջնական լուծումն անհրաժեշտ է զինադադար պահպանել։ ԵԱՀԿ ՄԽ շրջանակներում ղարաբաղյան հակամարտության խաղաղ կարգավորման բանակցություններն անցկացվում են սկսած 1992 թվականից։
Հայաստանի և Ադրբեջանի արտգործնախարարներ Էդվարդ Նալբանդյանի և Էլմար Մամեդյարովի հանդիպումը կարող է տեղի ունենալ Վիենայում դեկտեմբերին։ ԵԱՀԿ ՄԽ միջնորդները մտադիր են հանդիպման օրակարգում ներառել շփման գծում լարվածության նվազեցման քայլերն ու քաղաքական կարգավորման հարցերը։
