ԵՐԵՎԱՆ, 16 նոյեմբերի — Sputnik. Ռուսաստանի արտգործնախարարը Հայաստան աշխատանքային այցով կայցելի նոյեմբերի 20-21-ին, հայտնել է արտաքին գերատեսչության պաշտոնական ներկայացուցիչ Մարիա Զախարովան այսօր տեղի ունեցած ճեպազրույցի ժամանակ։
Նա ասել է, որ Լավրովը բանակցություններ է ունենալու իր հայ գործընկեր Էդվարդ Նալբանդյանի և ՀՀ նախագահ Սերժ Սարգսյանի հետ։
Լավրովն ու Նալբանդյանը կքննարկեն տարածաշրջանային անվտանգության խնդիրները, ինչպես նաև Լեռնային Ղարաբաղի հիմնախնդրի կարգավորման հեռանկարները։
«Այցն անցկացվում է հայ-ռուսական դիվանագիտական հարաբերությունների հաստատման 25-ամյակի և բարեկամության, համագործակցության և փոխօգնության մեծ պայմանագրի 20-ամյակի տարում։ Նախարարները կմասնակցեն «Ռուսաստան–Հայաստան. դարերով կոփված բարեկամություն» ցուցահանդեսի բացմանը, ինչպես նաև այս հոբելյանական ամսաթվին նվիրված հայկական նամականիշերի մարման արարողությանը», – ասել է Զախարովան։
Հայաստանի և Ռուսաստանի միջև նախատեսվում է 2018-2019 թթ. խորհրդակցությունների պլան ստորագրել։
Երկկողմ բանակցությունների օրակարգը ներառում է երկու երկրների միջև ընթացող համագործակցության լայն շրջանակ։ Կքննարկվի արտաքին գերատեսչական համագործակցություն ԵԱՏՄ–ի, ՀԱՊԿ–ի, ՄԱԿ–ի և այլ միջազգային կազմակերպությունների և ֆորումների շրջանակներում։
«Երկկողմ համագործակցության ընդլայնմանը նպաստում է բարձր մակարդակով աշխույժ քաղաքական երկխոսությունը, Մոսկվայում և Սոչիում տեղի ունեցած Հայաստանի և Ռուսաստանի նախագահների բանակցությունները», – գրված է հաղորդագրության մեջ։
Նոյեմբերի 15-ին Հայաստանի նախագահ Սերժ Սարգսյանը պաշտոնական այցով եղել է Մոսկվայում։
