ԵՐԵՎԱՆ, 16 նոյեմբերի — Sputnik. Հնդկաստանի քաղաքացիները կարող են հայկական վիզա ստանալ առանց հրավերի։ ՀՀ կառավարությունն այսօրվա նիստին հաստատել է այս մասին որոշումը։
Հիմա Գանգեսի ափերից հեռավոր Հայաստան հնարավոր կլինի ցանկացած պահի գալ ու վիզան երկիր մուտք գործելիս ստանալ, այլ ոչ թե դեսպանատուն գնալ։
Հայաստանն արդեն գրավում է հնդիկներին. 2017 թվականի հունվար–օգոստոսին Հնդկաստանում Հայաստանի դեսպանատունը գրեթե 40% –ով ավելի շատ վիզա է տրամադրել, քան 2016 թվականի նույն ամիսներին։
Բազմամիլիարդանոց երկրի համար այս թվերը դեռ շատ մեծ չեն` համարյա 1700 մարդ։ Բայց ինչքան ավելի հեշտ լինեն գործընթացներն, այդքան ավելի մեծ կարող է լինել այստեղ գալ ցանկացողների թիվը, կարծում է ԱԳՆ–ն։
Իսկ վարչապետ Կարեն Կարապետյանը նոր հորիզոնների մասին է խոսեց։
«Լավ։ Իսկ Չինաստանի հետ մենք նման համաձայնագիր ունե՞նք», – հարցրեց նա։
«Դեռ ոչ», – պատասխանեց արտաքին գործերի փոխնախարար Շավարշ Քոչարյանը։
Հնդկաստանում հայերի մասին առաջին հիշատակումը որոշ աղբյուրներում թվագրվում է մ.թ.ա. առաջին դարով։ Հայերը հնդկական աղբյուրներում հիշատակվում են Ալեքսանդր Մակեդոնացու արշավանքների ժամանակ։ Հաջորդ հիշատակումը վերաբերում է XVII դարին, երբ հայկական վաճառականները գնացին Հնդկաստան։ Այստեղ նրանք մեծ ունեցվածք ստեղծեցին ու սկսեցին եկեղեցիներ, դպրոցներ ու տպարաններ կառուցել։
Հայաստանի ու Հնդկաստանի միջև հարաբերությունները վերջին տարիներին բավականին ինտենսիվ են զարգանում. մի քանի պայմանավորվածություն է ձեռք բերվել, նաև համագործակցության մասին մի շարք հուշագրեր են ստորագրվել, մասնավորապես` կրթական ոլորտում։
