ԵՐԵՎԱՆ, 15 նոյեմբերի — Sputnik. RT գլխավոր խմբագիր Մարգարիտա Սիմոնյանը ցավակցել է բոլոր լրագրողներին` Ռուսաստանի Պետական Դումայի ընդունած ԶԼՄ–օտարերկրյա գործակալների մասին օրենքի մեջ մտցված փոփոխությունների կապակցությամբ։
Այսօր Ռուսաստանի Պետդուման վերջնական ընթերցմամբ ընդունել է օրենք, համաձայն որի օտարերկրյա ֆինանսավորում ստացող ԶԼՄ-ները կարող են Ռուսաստանում ճանաչվել «օտարերկրյա գործակալ»։ Օրենքի համաձայն՝ որոշումը, թե որ ԶԼՄ-ները կստանան օտարերկրյա գործակալի կարգավիճակ, կայացնելու է ՌԴ արդարադատության նախարարությունը:
«Սրտանց ցավակցում եմ բոլոր լրագրողներին, որոնք տուժում են Վաշինգտոնի գործողությունների պատճառով», – RT–ն մեջբերում է Սիմոնյանի խոսքը։
Միացյալ Նահանգների Պետդեպարտամենտը ավելի վաղ նշել էր, որ ԱՄՆ-ում օտարերկրյա գործակալների մասին օրենքը շատ տարբերվում է ռուսականից և չի սահմանափակում նորությունների ազատ հաղորդումը:
ՌԴ ԱԳՆ–ում այն ժամանակ հայտնեցին, որ Մոսկվան այդ իրավիճակին արձագանքելու միջոցներ է մշակում։
