ԵՐԵՎԱՆ, 15 նոյեմբերի — Sputnik. Չի կարելի ասել, թե Երևանից ավիատոմսերն ավելի թանկ են, քան Թբիլիսիից։ «Ելք» խմբակցության նման պնդմանն այսօր ԱԺ–ում այսպես պատասխանեց ՀՀ փոխվարչապետ Վաչե Գաբրիելյանը։
Անդրադառնալով այն հարցին, թե ինչու են ՀՀ-ից թռիչքները հիմնականում իրականացվում գիշերային ժամին` անհարմարություն պատճառելով ուղևորին Վաչե Գաբրիելյանն ասաց.
«ՀՀ-ից ուղևորահոսքը բավարար չէ, որ մեծ քանակությամբ թռչեն, մանավանդ եթե հետագա ուղղություն էլ չունեն: Բայց Եվրոպայից թռիչքները հիմնականում առավոտյան ութից են գնում, այդ պատճառով էլ առավել վաղ ժամերին պետք է այնտեղ լինեն. դրա տրամաբանությունն այն է, որ առավոտյան հասցնեն այն թռիչքին, որ գնում են այլ ուղղությամբ: Սա գնային քաղաքականության արդյունք չէ»:
Այն պնդումը, թե ՀՀ-ից շատ ուղևորափոխադրումներ իրականացվում է Վրաստանով, ըստ Վաչե Գաբրիելյանի ճիշտ չէ: Ըստ նրա՝ 2015թ. Թբիլիսի օդանավակայանը շուրջ 2 մլն թռիչք է իրականցրել, նույնը ՀՀ-ում է, 2,2 մլն էլ 2016թ. է եղել, և այդ թվերը համադրելի թվեր են. «Այսինքն` այն, թե ՀՀ-ի զբոսաշրջիկների հոսքն անցնում է Վրաստան՝ նման խնդիր գոյություն չունի»։Վաչե Գաբրիելյանն ավելացրեց, որ Գյումրին ունի հայկական ավիաընկերություններ, միայն ռուսական չեն:
««Տարոն Ավիա» հայկական ավիաընկերությունն այնտեղ է բազավորվել, «Արմենիա ավիան» Երևանում է բազավորված, այսինքն՝ միայն ռուսական չէ»,-ասաց նա:Ըստ փոխվարչապետի՝ ավիատոմսերի գներն առնվազն 20% –ով իջել են, որոշ ուղղություններով իջել են մի քանի անգամ:«Միաժամանակ ասում ենք, որ պետք է լինի տեղացի փոխադրող, որ լինի մրցունակ։ Բայց պետք է հասկանալ, որ այդ գների հաշվին է լինելու, մենք կամ մյուսը պետք է ուզենք, որ լինի մեծ հայկական ավիափոխադրող: Այսպիսով` փաստում ենք, որ գների իջեցում լինում է։ Բնականաբար, օդի տուրքը արտացոլվում է գների մեջ, բայց կանխորոշիչ չեն, որ ունենանք էական ուղևորահոսքերի ուղղորդում դեպի կից երկրներ, մասնավորապես՝ Վրաստան»,- ասաց Գաբրիելյանը:
