ԵՐԵՎԱՆ, 15 նոյեմբերի — Sputnik. «Մանկական Եվրատեսիլ– 2017»–ի Հայաստանի ներկայացուցիչ Միքայել Գրիգորյանը, այսօր, լրագրողների հետ հանդիպմանը ասել է, որ երազում է Արցախում մշտական խաղաղության մասին։
Նրա խոսքով` ինքն ուզում է բումերամգի միջոցով (Միշայի մրցույթային երգը կոչվում է Boomerang) հանդիսատեսին բարին ուղարկել։ Միշան կարծում է, որ հենց բարությունը կօգնի Հայաստանին հաղթել։
«Ես շատ հուզված եմ… Ինչ վերաբերում է երգին, ես ավելին էի ակնկալում, բայց հիմա ես պարապում ու հասկանում եմ, որ կատարման համար բազում «հնարքներ» կան», – ասաց Միշան։
Նա իրեն իրական մրցակից է համարում Բելառուսի, Ռուսաստանի ու Լեհաստանի մասնակիցներին։
«Եվրատեսիլի» հայ պատվիրակության նախագահ, Հայաստանի Հանրային հեռուստաընկերության ներկայացուցիչ Գոհար Գասպարյանը նշեց, որ այս տարի որոշ փոփոխություններ են տեղի ունեցել` ամեն երկիր կարող է քվեարկել ինչպես այլ, այնպես էլ իր երկրի մասնակցի օգտին։
Խոսելով «Մանկական Եվրատեսիլ – 20017»–ին Արցախի դրոշը առկայության մասին աղմուկին` նա նշեց, որ պետք չէ սադրանքի տրվել։
«Եթե սկզբում այս ամենը ուղղակի ծիծաղելի էր թվում, ապա հիմա հասկանում ենք, որ պետք չէ տրվել այդ սադրանքներին։ Մենք լավ տրամադրությամբ գնում ենք` մեր երկիրը արժանապատվորեն ներկայացնելու», – հավելեց նա` պատասխանելով Sputnik Արմենիայի հարցին։
Միշայի պրոդյուսեր Լիրա Քոչարյանը հավելեց, որ Միշայի համարի վրա մեծ թիմ է աշխատում։
«Վերջին տարիներին մեզ մի քանի միավոր չի հերիքում` առաջին տեղը գրավելու համար։ Հնարավոր է` Միշան այդ հաղթողը կդառնա 2017 թվականին։ Նա արդեն պատրաստ է, նույնիսկ եթե նրան հենց հիմա ասեն դուրս արի բեմ ու երգի` նա կանի դա», – ասաց տղայի պրոդյուսերը։
Նրա խոսքով` երգի ընտրությունը պատահական չէ, երբ մի քանի անգամ լսում ես այն` միանգամից սիրահարվում ես երգին։
«Այդ ժանրը շատ անկեղծ է, հատուկ ուղերձ ունի իր մեջ` խաղաղություն մեր երկրին… Ինքնատիպ կատարում է լինելու, բայց հիմա գաղտնիքները չենք բացի։ Միշան բեմի վրա մենակ է լինելու, չի լինելու ոչ բեք վոկալ, ոչ բալետ։ Մի կողմից` դա բարդ է, մյուս կողմից նա հեքիաթային մթնոլորտ կստեղծի», – հավելեց Քոչարյանը։
«Մանկական Եվրատեսիլ-2017» երգի միջազգային մրցույթի մասնակից Միշան՝ Միքայել Գրիգորյանը (նույնպես ծննդով Արցախից է) կներկայանա «Բումերանգ» երգով: Երգի երաժշտության հեղինակը Վահրամ Պետրոսյանն է, խոսքերի հեղինակներն են Ավետ Բարսեղյանը, Դավիթ Ծերունյանը, Արթուր Աղեկյանը:
9-ամյա Միշան իր երաժշտական ճանապարհը սկսել է Լիրա Քոչարյանի ղեկավարած «Արցախի ձայներ» նախագծից, որի շնորհիվ հնարավորություն է ստացել ելույթ ունենալ տարբեր երկրներում պրոֆեսիոնալ երգիչների հետ միասին: Փոքրիկ արցախցին 2016 թ.-ին մեր հայրենիքը ներկայացրել է մանկական «Նոր ալիք» երգի մրցույթում ու զբաղեցրել 2-րդ հորիզոնականը:
«Մանկական Եվրատեսիլ-2017»-ը կանցկացվի 15-րդ անգամ՝ Shine Bright («Շողա պայծառ») նշանաբանի ներքո: Բացի Հայաստանից, կմասնակցի ևս 15 երկրի ներկայացուցիչ. Ալբանիա, Ավստրալիա, Բելառուս, Կիպրոս, Իռլանդիա, Իտալիա, Մակեդոնիա, Մալթա, Նիդեռլանդներ, Ուկրաինա, Ռուսաստան, Լեհաստան, Սերբիա, Պորտուգալիա և մրցույթը հյուրընկալող երկիրը՝ Վրաստան:
