ԵՐԵՎԱՆ, 15 նոյեմբերի – Sputnik. Հայաստանի բնակիչների գրեթե մեկ քառորդը, որն օգտվում է համակարգչից, 2017թ-ի երրորդ եռամսյակում բախվել է ցանցային հարձակման սպառնալիքի հետ: Հայաստանն այդ ցուցանիշով աշխարհում զբաղեցրել է չորրորդ տեղը՝ առաջ անցնելով Ադրբեջանից, որը գտնվում է յոթերորդ տեղում: Այդ մասին Sputnik Արմենիային հաղորդել են «Կասպերսկու լաբորատորիայում»:
«Կասպերսկու լաբորատորիայի» անցկացրած հետազոտությունների արդյունքներով Բելառուսը հայտնվել է առաջին տեղում, Ալժիրը՝ երկրորդ, Ռուսաստանը՝ երրորդ, Հայաստանը՝ չորրորդ, Մոլդովան՝ հինգերորդ: Վեցերորդ տեղում գտնվում է Հունաստանը, յոթերորդ տեղում՝ Ադրբեջանը, Ղրղզըստանը՝ ութերորդ, Ուզբեկստանը՝ իններորդ, Ալբանիան՝ տասներորդ:
Հետազոտությունները ցույց են տվել, որ հայ օգտատերերի 23,74 տոկոսը նշված ժամանակահատվածում բախվել է Malware վնասակար ծրագրի գրոհի փորձերի հետ: Հայաստանում և Վրաստանում «Կասպերսկու լաբորատորիայի» տարածաշրջանային ներկայացուցիչ Արմեն Կարապետյանը նշել է, որ չարագործների ակտիվությունը կապված է նրա հետ, որ Հայաստանում ինտերնետի սրընթաց տարածումն օգտատերերի առաջ նոր մարտահրավերներ է դնում:
«Ներկայացված ցուցանիշները վերաբերում են այն օգտատերերին, որոնք պաշտպանում են իրենց սարքերը հակավիրուսային ծրագրերով; Հաշվի առնելով այն, որ մեր երկրներում դեռ տարածված չէ համացանցում անվտանգության կանոններին հետևելու մշակույթը, կարելի է ենթադրել, որ գրոհի ենթարկվող օգտատերերի թիվն ավելի մեծ է»,- հավելեց Կարապետյանը:
Վնասակար ծրագրերով վարակվելու վտանգը գնահատելու համար «Կասպերկսու լաբորատորիայի» փորձագետները մշակել են հատուկ մեթոդ: Յուրաքանչյուր երկրում նրանք հաշվարկել են հակավիրուսային ծրագրերի այն օգտատերերի տոկոսը, որոնց ցանցային հակավիրուսը զգուշացրել է վնասակար ծրագրի թափանցման սպառնալիքի մասին:
Ընկերության տվյալներով՝ նշված շրջանում ամբողջ աշխարհում համակարգիչների մոտ 16,61 տոկոսը ենթարկվել է Malware վիրուսի հարձակմանն առնվազն մեկ անգամ:
