ԵՐԵՎԱՆ, 13 նոյեմբերի — Sputnik. Federbet ընկերությունը, որը զբաղվում է ֆուտբոլային հանդիպումների ուսումնասիրությամբ և պայմանավորված խաղերի բացահայտումներով, ֆուտբոլի Հայաստան- Բելառուս ազգային հավաքականների ընկերային հանդիպումից հետո կասկածեց, որ այդ մրցավեճում կարող է և կողմերի միջև պայմանավորվածություն է եղել:
Ի սկզբանե նշենք, որ աշխարհում ու, մասնավորապես, Եվրոպայում գործակիցները սահմանելիս բուքմեյքերական ընկերությունները հաշվի են առնում այս ոլորտում առաջատար բուքմեյքերների կարծիքը: Bet365, Wiliam Hill, Betfair, Sportradar բուքմեյքերական ընկերությունները շատ մեծ ցանց ունեն աշխարհում և ահռելի փորձ: Այդ ընկերությունների կարծիքը հաշվի են առնում բոլորը:
Անդրադառնալով Հայաստան-Բելառուս խաղին՝ ձեզ ենք ներկայացնում տարբեր ընկերությունների սահմանած խաղադրույքն այդ հանդիպումից առաջ, որը սահմանվել էր 2.5 գոլից ավելի լինելու համար, ներկայացրել է բելառուսական прессбол կայքը:
Ընդհանրապես, նման կասկածները առաջանում են, երբ խաղից առաջ կամ խաղի ընթացքում սահմանված խաղադրույքներից մեկի վրա սկսվում են մեծ գումարներ դրվել: Տվյալ դեպքում կասկածելի է եղել այս խաղում 2.5 գնդակից ավելի խաղադրույքի հետ կապված երևույթը: Ստացվում է, որ խաղից առաջ այն, որ հանդիպման ընթացքում երեք գոլ կլինի, սահմանված խաղադրույքը կոնկրետ bet365 բուքմեյքերի մոտ եղել է 2.10, իսկ հանդիպման մեկնարկից առաջ այն նվազել է մեկ տասնորդականով և դարձել երկուս:
Կասկածն առաջացել է առաջին խաղակեսի վերջում, երբ 40 րոպե դարպասի գրավում չի արձանագրվել, իսկ 2 գործակիցը մնացել է նույնը ու չի աճել: Գործակցի աճելը կնշանակեր, որ երեք գոլ լինելու հավանականությունը նվազել է: Ինչպես գիտենք, երեք րոպեի ընթացքում Հայաստանի հավաքականը երկու գնդակ խփեց մրցակցի դարպասը, իսկ երկրորդ կեսի սկզբում էլ հաշիվը դարձավ 3:0: Այսինքն, գործակիցն աշխատեց:
Գործակիցները խաղի ընթացքում բուքմեյքերի կողմից միշտ էլ փոփոխվում են՝ կապված խաղի ընթացքի կամ հաշվի հետ: Բացի դրանից, եթե մեծ գումարներ են դրվում նույն գործակցի վրա, դա արդեն կասկած է հարուցում բուքմեյքերի մոտ, և եղել են դեպքեր, երբ կոնկրետ այդ գործակիցն, ընդհանրապես, հանվել է հայտից: Ստացվում է, որ եթե գործակիցը չի փոխվել, ուրեմն մեծ գումարներ չեն դրվել: Հակառակ դեպքում այս փորձառու բուքմեյքերը կփոխեր սահմանված գործակիցը:
Գործնականում, շատ են եղել դեպքերը, երբ բուքմեյքերը, նույնիսկ, լիմիտ է սահմանում խաղադրույք կատարելու համար՝ արդեն նախօրոք ինչ-որ բան կասկածելով կամ գուշակելով: Ֆուտբոլում մեկ անգամ չէ, որ խաղերի արդյունքները կասկածի տակ են դրվել, բայց շատ քիչ դեպքեր կան, որ դրանք ապացուցվել են:
